30-noyabr kuni soat 07:42 da Toshkent viloyati Yangiyo‘l tumani “Qirariq” MFYda joylashgan 80-sonli uyda gaz-havo aralashmasi chaqnashi oqibatida yong‘in kelib chiqqan. Bu haqda FVV xabar berdi.
Birlamchi ma’lumotlarga ko‘ra, chaqnash natijasida uyning bir qismi qulab tushgan va xonadon egalari vayronalar ostida qolgan. Turar joyning zarar yetgan qismidan 36 yoshli I.S., 33 yoshli I.N., 14 yoshli I.R. va 11 yoshli I.S. olib chiqilib, tibbiyot muassasasiga yuborilgan.
Biroq ko‘rsatilgan yordamga qaramay I.S. va I.R. vafot etgan, I.N. hamda 11 yoshli I.S. turli darajada tan jarohatlarini olgan.
“Chaqnashning asosiy sababi sifatida tabiiy gazdan foydalanish qoidalarining buzilishi taxmin qilinmoqda”, — deyiladi xabarda.
Voqea joyida Toshkent viloyati hokimligi, viloyat IIB, FVB, SSB va tegishli idoralarning kuch va vositalarini jalb qilingan bo‘lib, favqulodda vaziyat oqibatlarini bartaraf etish choralari ko‘rilmoqda.
Avvalroq Qibraydagi xonadonda gaz portlashi oqibatida uy egasi va uning o‘g‘li halok bo‘lgani to‘g‘risida xabar berilgandi.
Izoh (0)