O‘zbekistonda 274 ta kichik ekobozorlarning qurilishi boshlab yuborildi, 160 tasi esa to‘liq barpo etildi. Bu haqda 28-noyabr kuni Bosh prokuror Nig‘matilla Yo‘ldoshev rahbarligida oziq-ovqat mahsulotlari narxining barqarorligini ta’minlash borasida amalga oshirilayotgan ishlar yuzasidan o‘tkazilgan videoselektor yig‘ilishida ma’lum qilindi.
Bosh prokuratura matbuot xizmatining qayd etishicha, Prezident tomonidan 2020-yil 16-oktabr kuni mamlakatda oziq-ovqat xavfsizligini, shuningdek qish-bahor mavsumida narxlarning barqaror saqlanishini ta’minlash, oziq-ovqat mahsulotlari zaxirasini jamg‘arish va “daladan-dasturxonga tamoyilini” to‘liq joriy etish, narx-navoning asossiz oshishini oldini olish masalalari bo‘yicha kechiktirib bo‘lmas choralarni ko‘rish yuzasidan berilgan topshirig‘iga muvofiq Bosh prokuratura huzuridagi Departament organlari tomonidan mutasaddi tashkilotlar va mahalliy hokimliklar bilan hamkorlikda muayyan ishlar amalga oshirilmoqda.
Xususan, mamlakat dehqon bozorlarida 473 ta arzonlashtirilgan maxsus rastalar tashkil etilib, ishlab chiqaruvchining o‘z narxida mahsulot sotishi ta’minlandi, zarur bo‘lgan hollarda esa bevosita yuk mashinasidan savdo qilish uchun sharoit yaratib berildi.
Har bir bozorga mas’ul xodimlar biriktirilgan holda kunlik monitoring o‘tkazilib, narx-navoning oshishi ehtimoli mavjud bo‘lgan mahsulotlarni ishlab chiqaruvchi narxida intervensiya qilish choralari ko‘rilmoqda.
2020-yilning 15-martidan shu kunga qadar 72,4 ming tonna kartoshka, 74,1 ming tonna piyoz, 22,6 ming tonna sabzi, 4,8 ming tonna karam, 5,8 ming tonna tovuq go‘shti, 13,8 ming tonna go‘sht, 63,1 mln dona tuxum, 8,6 ming tonna guruch va 8,4 ming tonna shakar ishlab chiqaruvchilar narxida bir hududdan ikkinchisiga intervensiya qilingan.
Shuningdek, joylarda ishlab chiqaruvchilar, fermer va dehqonlar uchun kichik ekobozorlarni tashkil etish topshirig‘iga binoan mahalliy hokimliklar bilan hamkorlikda hududlarda 274 ta kichik ekobozorlarning qurilishi boshlab yuborildi, 160 tasi esa to‘liq barpo etilgan.
Izoh (0)