28-noyabr kuni Urganch shahridagi studiyadan bosh vazirining o‘rinbosari Sardor Umurzoqov rahbarligida eksport va investitsiyalarni rivojlantirish masalalari bo‘yicha videoselektor yig‘ilishi o‘tkazildi. Bu haqda Investitsiyalar va tashqi savdo vazirligi matbuot xizmati xabar berdi.
Unda hukumat komissiyasi a’zolari, vazirliklar, idoralar, sanoat birlashmalari, aksiyadorlik jamiyatlari, tijorat banklari, O‘zbekistonning chet eldagi diplomatik vakolatxonalari, Qoraqalpog‘iston Respublikasi, viloyatlar va Toshkent shahar mahalliy hokimiyat organlari rahbarlari jalb etilgan holda investitsiya va eksportning dolzarb masalalari muhokama qilingan.
Muhokama qilish chog‘ida vazirliklar, idoralar, sanoat birlashmalari va mahalliy hokimiyat organlari rahbarlarining sanoat va hududlar kesimida investitsiya va eksport faoliyatini kuchaytirish bo‘yicha ko‘rilayotgan chora-tadbirlar to‘g‘risida hisobotlari tinglangan
Ta’kidlanishicha, tadbirkor va eksportchilar bugungi kunda mavjud investitsiya va eksport salohiyatidan to‘liq foydalanishga to‘sqinlik qiluvchi bir qator tizimli va xususiy tusga ega muammolarga duch kelayotgani aniqlangan. Ishbilarmonlarni samarali qo‘llab-quvvatlash tadbirlari amalga oshirilishini ta’minlash maqsadida korxonalarga chiqqan holda tadbirkor va eksportchilar bilan bevosita ishlash zarurligi ta’kidlangan. Shu munosabat bilan Investitsiyalar va tashqi savdo vazirligi, Tashqi ishlar vazirligi hamda tijorat banklarining xodimlarini hududlarga yuborish to‘g‘risida qaror qabul qilingan. Ularning vazifalari etib tadbirkorlarning mavjud muammolarini aniqlash va ularni tezkor hal etish, shuningdek, investitsiya loyihalarini amalga oshirish va eksport hajmini ko‘paytirish uchun yangi zaxira va imkoniyatlarni aniqlash belgilangan.
“Tadbirda investitsiya va tashqi savdo faoliyatiga salbiy ta’sir ko‘rsatuvchi alohida omillar ham atroflicha o‘rganilib, tegishli rahbarlarga manzilli ko‘rsatmalar berildi. Xususan, eksportchi korxonalarga gaz va elektr energiyasini uzluksiz yetkazib berishni ta’minlashga qaratilgan tezkor chora-tadbirlar ko‘rish bo‘yicha aniq topshiriqlar berildi”, — deyiladi xabarda.
Tadbirda eksportchilarga moliyaviy yordam ko‘rsatishda tijorat banklari yetarli darajada faol emasligi ham qayd etilgan — birgina o‘tgan haftada respublika eksportchilarini qo‘llab-quvvatlash shtabiga jami 85 milliard so‘m miqdorida eksportoldi moliyalashtirish mablag‘larini ajratishda ko‘maklashish uchun 25 ta ariza kelib tushgan. Shu munosabat bilan tijorat banklari rahbarlarining e’tibori tadbirkorlar va eksportchilarni o‘z vaqtida qo‘llab-quvvatlash maqsadida ular bilan faol ishlash zarurligiga qaratilgan.
Videoselektor yig‘ilishi davomida berilgan ko‘rsatmalarning o‘z vaqtida va sifatli bajarilishi uchun vazirliklar, idoralar, tijorat banklari, mahalliy hokimiyat va xorijdagi diplomatik vakolatxonalar rahbarlarining shaxsiy mas’uliyati ham belgilangan O‘zbekiston Bosh prokuraturasi topshiriqlar ijrosining doimiy monitoringini olib boradi.
Avvalroq O‘zbekistondagi sement zavodlari elektr ta’minotidan uzilgani to‘g‘risidagi xabarlar tarqalgan edi. Keyinroq Energetika vazirligi ushbu xabarlar asossiz ekanligini ma’lum qilgan.
Izoh (0)