Янгийўлдаги хонадонда газ портлаши оқибатида икки киши ҳалок бўлди, уйнинг бир қисми қулаб тушган

30 ноябрь куни соат 07:42 да Тошкент вилояти Янгийўл тумани «Қирариқ» МФЙда жойлашган 80-сонли уйда газ-ҳаво аралашмаси чақнаши оқибатида ёнғин келиб чиққан. Бу ҳақда ФВВ хабар берди.

Бирламчи маълумотларга кўра, чақнаш натижасида уйнинг бир қисми қулаб тушган ва хонадон эгалари вайроналар остида қолган. Турар жойнинг зарар етган қисмидан 36 ёшли И.С., 33 ёшли И.Н., 14 ёшли И.Р. ва 11 ёшли И.С. олиб чиқилиб, тиббиёт муассасасига юборилган.

Бироқ кўрсатилган ёрдамга қарамай И.С. ва И.Р. вафот этган, И.Н. ҳамда 11 ёшли И.С. турли даражада тан жароҳатларини олган.

«Чақнашнинг асосий сабаби сифатида табиий газдан фойдаланиш қоидаларининг бузилиши тахмин қилинмоқда», — дейилади хабарда.

Воқеа жойида Тошкент вилояти ҳокимлиги, вилоят ИИБ, ФВБ, ССБ ва тегишли идораларнинг куч ва воситаларини жалб қилинган бўлиб, фавқулодда вазият оқибатларини бартараф этиш чоралари кўрилмоқда.

Аввалроқ Қибрайдаги хонадонда газ портлаши оқибатида уй эгаси ва унинг ўғли ҳалок бўлгани тўғрисида хабар берилганди.