O‘zbekistonda 2020-yil yakuniga qadar ijro hujjatlari bo‘yicha davlat foydasiga 2 trillion so‘m undiriladi. Bu haqda 28-noyabr kuni Bosh prokuror Nig‘matilla Yo‘ldoshev rahbarligida o‘tkazilgan videoselektor yig‘ilishida ma’lum qilindi.
Yig‘ilish ijtimoiy ahamiyatga ega oziq-ovqat mahsulotlari narxining barqarorligini ta’minlash borasida amalga oshirilayotgan ishlar, shuningdek, ijro hujjatlari bo‘yicha undiruvni ta’minlash yuzasidan o‘tkazilgan.
Qayd etilishicha, 2020-yil oxirigacha jami 5 trillion, shundan davlatga 2 trillon so‘mlik ijro hujjatlarini undirish bo‘yicha reja grafik tasdiqlangan. 1—17-noyabr kunlari qoldiqdagi ijro hujjatlari bo‘yicha qariyb 323 milliard so‘m undirilgan.
O‘tgan 8 kunda esa jami 1,3 trillion so‘m, shundan davlat foydasiga 364,3 milliard so‘m undirilishi ta’minlangan.
Yig‘ilishda hududlarda ijro hujjatlari bo‘yicha undiruvni ta’minlashda sustkashlikka yo‘l qo‘yayotgan MIBning mas’ul xodimlari ham keskin tanqid ostiga olinib, o‘z faoliyatida asosiy e’tiborni davlat undiruviga qaratishi lozimligi tushuntirilgan.
O‘z o‘rnida, tadbirda xatlangan mol-mulklarning sotilishi, jinoiy jarimalar hamda soliq qarzdorligini undirish borasidagi ishlarni yanada jadallashtirish borasida aniq topshiriqlar berilgan.
Izoh (0)