28-noyabr, dushanba kuni O‘zbekiston futbol assotsiatsiyasi (O‘FA) ijroqo‘mining navbatdagi yig‘ilishi bo‘lib o‘tdi.
O‘FA prezidenti Abdusalom Azizov, ijroqo‘m a’zolari va mutaxassislar ishtirokidagi yig‘ilishda bir qator qarorlar qabul qilindi.
Unga ko‘ra, 2021-yildan boshlab O‘zbekiston terma jamoasi, shuningdek, U-22 va U-19 terma jamoalari bosh murabbiylari faqat terma jamoada ishlashi belgilandi va ularning bir vaqtning o‘zida klubda faoliyat yuritishi taqiqlandi.
Shuningdek, vakant bo‘lib turgan O‘FA texnik direktorligi lavozimiga Sergey Arslonov tayinlandi.
Eslatib o‘tamiz, O‘zbekiston terma jamoasi bosh murabbiyi Vadim Abramov bir vaqtning o‘zida “Bunyodkor” ustozi hisoblanadi. Shuningdek, U-19 bosh murabbiyi Temur Kapadze “Lokomotiv”da bosh murabbiy Andrey Miklyayevga assistent, bundan tashqari u milliy jamoada rasman Abramovga yordamchi hisoblanadi. U-22 ustozi Ravshan Haydarov esa ayni damda “Surxon” jamoasi bosh murabbiyi ham hisoblanadi.
Avvalroq Abramov “Futbol plyus” radioeshittirishida bergan intervyusida O‘zbekiston terma jamoasi JCh—2022 saralashining keyingi bosqichiga chiqa olsa, “Bunyodkor”ni tark etishini ma’lum qilgandi.
Mavzuga doir: Ikki ot jilovini tutganlar. Parallel 2 ta lavozimda ishlash O‘zbekiston terma jamoasi murabbiylari uchun foydali bo‘lganmi?
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)