28 ноябрь, душанба куни Ўзбекистон футбол ассоциацияси (ЎФА) ижроқўмининг навбатдаги йиғилиши бўлиб ўтди.
ЎФА президенти Абдусалом Азизов, ижроқўм аъзолари ва мутахассислар иштирокидаги йиғилишда бир қатор қарорлар қабул қилинди.
Унга кўра, 2021 йилдан бошлаб Ўзбекистон терма жамоаси, шунингдек, U-22 ва U-19 терма жамоалари бош мураббийлари фақат терма жамоада ишлаши белгиланди ва уларнинг бир вақтнинг ўзида клубда фаолият юритиши тақиқланди.
Шунингдек, вакант бўлиб турган ЎФА техник директорлиги лавозимига Сергей Арслонов тайинланди.
Эслатиб ўтамиз, Ўзбекистон терма жамоаси бош мураббийи Вадим Абрамов бир вақтнинг ўзида «Бунёдкор» устози ҳисобланади. Шунингдек, U-19 бош мураббийи Темур Кападзе «Локомотив»да бош мураббий Андрей Микляевга ассистент, бундан ташқари у миллий жамоада расман Абрамовга ёрдамчи ҳисобланади. U-22 устози Равшан Ҳайдаров эса айни дамда «Сурхон» жамоаси бош мураббийи ҳам ҳисобланади.
Аввалроқ Абрамов «Футбол плюс» радиоэшиттиришида берган интервьюсида Ўзбекистон терма жамоаси ЖЧ—2022 саралашининг кейинги босқичига чиқа олса, «Бунёдкор»ни тарк этишини маълум қилганди.
Мавзуга доир: Икки от жиловини тутганлар. Параллел 2 та лавозимда ишлаш Ўзбекистон терма жамоаси мураббийлари учун фойдали бўлганми?
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)