Кадастр соҳасидан ишдан кетган собиқ ходимлар орасида одамларнинг ишончига кириб фирибгарлик йўли билан бойлик орттирмоқчи бўлганлар талайгина. Бу ҳақда Кадастр агентлиги директори ўринбосари Мирсаид Мирмақсудов журналистлар билан очиқ мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
Анжуманда маълум қилинишича, йил бошидан буён ходимлар билан боғлиқ 21 та коррупцион ҳолат аниқланган. 2020 йилнинг 1 июнидан 18 ноябригача бўлган вақт мобайнида 12 нафар ходимга нисбатан жиноят иши қўзғатилган.
«Энг ачинарли томони шундаки аксарият коррупцион ҳолатлар кадастрнинг собиқ ходимлари томонидан содир этилмоқда. Ишдан кетганига бир неча йил бўлган бўлса-да, одамларнинг ишончига кириб фирибгарлик йўли билан бойлик орттирмоқчи бўлганлар талайгина», – деди Мирсаид Мирмақсудов.
Маълумот учун, 2019 йилда тизимидаги 54 нафар ходимга нисбатан жиноят иши қўзғатилган, 62 нафар ходим фирибгарлик жинояти билан қўлга олинган.
Эслатиб ўтамиз, Ўзбекистон Президенти ҳузурида 15 октябрь куни ўтказилган йиғилишда Тошкент шаҳар ҳокимлиги қошидаги капитал қурилиш бош бошқармаси бошлиғи ўринбосари, Чилонзор туманидаги инвестициялар ва ташқи савдо бўлими бошлиғи, Қибрай, Чилонзор, Бувайда, Оққўрғон, Бўстонлиқ тумани ҳокимининг ўринбосари, Марҳамат тумани ҳокими ёрдамчиси ер майдонини сотаётган вақтида жиноят устида қўлга олингани айтиб ўтилган.
Изоҳ (0)