Qashqadaryo viloyat xalq ta’limi boshqarmasining sobiq boshlig‘i Farhod Ochilov Prezident Shavkat Mirziyoyevga ma’qul kelmagan va shu sabab bilan ishdan olingan. Bu haqda xalq ta’limi vaziri Sherzod Shermatov ma’lum qildi deya xabar berdi “Daryo” muxbiri.
2020-yil 25-noyabr kuni vazir Sherzod Shermatov ishtirokidagi yig‘ilishda viloyat xalq ta’limi boshqarmasiga yangi rahbar tayinlanishi barobarida sobiq rahbarning ishdan olinish sababi ham ochiqlangan.
“Viloyat boshqarmasiga qo‘yilgan yangi rahbar quruq va balandparvoz gaplar gapirib, davlatimiz rahbarining ham ko‘nglini xira qildi. O‘tgan safar hammani yig‘ib bu haqda gaplashib olgandik. Shu sabab davlatimiz rahbari bu masalada norozi bo‘lib, bunaqada Qashqadaryo ta’limini ko‘tarolmaymiz, o‘zi shundog‘am viloyat respublikada eng oxirgi o‘rinlarda, degandi”, — dedi vazir.
Sherzod Shermatovning qo‘shimcha qilishicha, Prezident Shavkat Mirziyoyev 2020-yilning 12—13-noyabr kunlari viloyatga tashrifi chog‘ida Qashqadaryoda ta’lim sifati yomonligini aytib, kadrlar tanlashdagi xatoliklar haqida gapirgan.
“Viloyat xalq ta’limi tizimini tekshirish uchun audit tekshiruv tashlaganimizda qancha muammolar borligi ma’lum bo‘ldi. Prezidentimiz muammolar juda ko‘p. Shu muammolarni kim yechib beradi, viloyatning jonkuyar kadri. Shuning uchun yaxshi kadr qo‘yinglar, kerak bo‘lsa, hokimni olib, bu yoqqa qo‘yinglar, bu muhim masala, degandi”, — deydi vazir Shermatov.
Eslatib o‘tamiz, Sherzod Shermatov ishtirokidagi yig‘ilishda Qashqadaryo viloyat xalq ta’limi boshqarmasiga ayni kunga qadar Shahrisabz shahrini boshqarib kelgan To‘lqin Karimov tayinlangani haqida xabar berilgandi.
Izoh (0)