Qozog‘istonning yirik Magnum Cash&Carry savdo tarmog‘i Toshkentda filialini ochishni rejalashtirmoqda. Bu haqda poytaxt hokimi Jahongir Ortiqxo‘jayev va bir guruh qozog‘istonlik tadbirkorlar ishtirokida o‘tkazilgan uchrashuvda kompaniya boshqaruv raisi Azamat Osmanov ma’lum qildi.
“Bizga shaharning rivojlanish rejasi, qayerga ketyapti, qanday ketyapti, ishonchli developerlardan qaysi biri bizga sherik bo‘la olishi haqidagi ma’lumotlar bilan yordam berishingizni so‘raymiz. Biz o‘zimiz bilan investitsiya olib kelamiz”, — deydi tadbirkor.
Uning so‘zlariga ko‘ra, katta hajmdagi format doirasida har bir nuqta uchun investitsiyalar hajmi 5 million dollarni tashkil etadi.
“Biz savdo markaziga yoki uning egasining aktivlariga investitsiya kiritamiz. Bitta do‘konda 500 tagacha ish o‘rni, keyingi yili 6 tagacha savdo nuqtasini ochish rejamiz bor”, — deydi Azamat Osmanov.
Kompaniya yoz oyidayoq O‘zbekistonda savdo belgisini ro‘yxatdan o‘tkazish bo‘yicha ariza bergan, sentabrda esa xodimlarni ishga olishni boshlagan edi.
Iyul oyida Magnum Cash&Carry rahbari Azamat Osmanov kompaniya o‘zining savdo markasini rivojlantirayotgani, e-commerce segmentida, tayyor taomlarni yetkazib berish segmentidagi operatsiyalarni rivojlantirishni rejalashtirayoganini ma’lum qilgan.
Spot’ning “Forbes.kz”ga tayanib yozishicha, 2019-yil yakunlariga ko‘ra, kompaniya Qozog‘istondagi eng yirik xususiy 50 ta kompaniyalar orasida 10-o‘rinni egallagan (430 million dollar daromad va 5,1 million dollar sof foyda).
Eslatib o‘tamiz, 2019-yilning oktabrida Toshkent shahrida xalqaro brenddagi Carrefour supermarket va gipermarketlar tarmog‘ini ochish bo‘yicha Akfa Group bilan bitim imzolagani ma’lum bo‘lgandi. Makro tarmog‘i boshqaruvchisi Roman Sayfulin o‘shanda O‘zbekiston bozori katta potensialga ega ekanligi va u yana bir necha savdo operatorlarini “yutib yuborishga” tayyorligini bildirgan.
Izoh (0)