JSST: koronavirusni birinchi bo‘lib bir yo‘la bir necha kishi yuqtirib olgan bo‘lishi mumkin

Koronavirus infeksiyasiga dunyoda birinchi bo‘lib bir yo‘la bir necha kishi chalingan bo‘lishi, ular virusni turli tarqatuvchilardan yuqtirgan bo‘lishi mumkin. Bu haqda Jahon sog‘liqni saqlash tashkilotining (JSST) sog‘liqni saqlash sohasidagi favqulodda vaziyatlar bo‘yicha dasturi direktori Maykl Rayan ma’lum qildi, deb yozadi “RBK”.

“Dastlabki holat yagona bo‘lmasligi mumkin, ko‘proq bo‘lishi mumkin. Bu odam bo‘lishi mumkin, lekin bu hayvon ham bo‘lishi mumkin”, — dedi u.

Rayanning ta’kidlashicha, virusning “oraliq tashuvchisi” ham bo‘lishi mumkin.

JSST vakili aniqlik kiritishicha, hozir virus odam va hayvon o‘rtasidagi to‘siqni qanday yorib o‘tganini aniqlash muhim. Agar virus hayvonlar orasida tarqalishi mumkin bo‘lsa, bu odamlar orasida kasallanishlar soni ortishiga olib keladi. “Yaqindagina biz bunday muammoga guvoh bo‘ldik, ya’ni virus qorako‘zandan odamga yuqishni boshlagan edi”, — dedi Rayan.

Fox News telekanali Xitoy hukumati qarorlaridan xabardor bo‘lgan va tegishli hujjatlarni ko‘rgan bir nechta manbalariga tayanib, koronavirus infeksiyasiga chalingan birinchi odam Xitoyning Uxan shahridagi laboratoriyalardan birida ishlagani haqida xabar bergandi.

Telekanal hamsuhbatlari ta’kidlashicha, odamga infeksiya ko‘rshapalaklardan yuqqan, “boshlang‘ich bemor” esa uni keyin shahardagi boshqa odamlarga tarqatgan. Kasallikni birinchi yuqtirgan odam dengiz mahsulotlari bozorida paydo bo‘lgani haqidagi versiyani telekanal manbalari rad etgan va bu versiya laboratoriya aybini xaspo‘shlash uchun qo‘llanilganini aytgan. JSST va Xitoy hukumati SARS-CoV-2 koronavirusi sun’iy kelib chiqish belgilariga ega emasligini bir necha marta ma’lum qilgan edi.

So‘nggi ma’lumotlarga qaraganda, dunyoda pandemiya boshidan buyon 59 106 877 kishi COVID-19’ni yuqtirib olgan, 1 395 176 kishi vafot etgan.

Jahon sog‘liqni saqlash tashkiloti ma’lumotlariga ko‘ra, so‘nggi bir oyda dunyo bo‘yicha aniqlangan kasallanish holatlari pandemiyaning ilk olti oyi davomida aniqlangandan ko‘ra ko‘proqdir. So‘nggi ikki hafta mobaynida tashkilot bir hafta uchun rekord darajadagi kasallanish holatlarini qayd etdi. AQShda esa bir haftada 1 milliondan ziyod koronavirusga chalinish holati aniqlandi.

Avvalroq Jahon sog‘liqni saqlash tashkilotining COVID-19 bo‘yicha maxsus elchisi Devid Nabarro mamlakatlar infeksiyaga qarshi kurash uchun zarur infratuzilmani yaratmasa, Yevropada koronavirus tarqalishining uchinchi to‘lqini ko‘tarilishi mumkinligini ma’lum qilgan edi.