Rossiyada yaratilgan koronavirusga qarshi “Sputnik V” vaksinasining ikkita dozasi narxi xalqaro bozor uchun, taxminan, 20 dollarni tashkil qiladi, rossiyaliklar uchun vaksina bepul bo‘ladi. Bu haqda Rossiya to‘g‘ridan to‘g‘ri investitsiyalar jamg‘armasi tomonidan ma’lum qilindi, deb yozmoqda “Korrespondent.net”.
“Rossiyaning ‘Sputnik V’ vaksinasining xalqaro bozorlar uchun narxi 2021-yil fevral oyidan boshlab har bir doza uchun 10 dollardan kam bo‘ladi, bu bitta odamni emlash uchun zarur bo‘lgan ikki dozaning narxi 20 dollardan kam bo‘lishini bildiradi. Shunday qilib, ‘Sputnik V’ unga o‘xshash samaradorlik ko‘rsatkichlariga ega mRNA texnologiyasiga asoslangan xorijiy vaksinalarga qaraganda ikki yoki undan ko‘p marta arzonroq bo‘ladi. ‘Sputnik V’ bilan emlash rossiyaliklar uchun bepul bo‘ladi”, — deyiladi jamg‘arma xabarida.
Ta’kidlanishicha, bemorning ikkinchi dozani qabul qilish sharti bilan vaksinaning birinchi dozasi qabul qilinganidan keyin 42-kuni emlash samaradorligi 95 foizdan oshadi.
“Tahlillarga ko‘ra, ‘Sputnik V’ning birinchi dozasini olganidan keyin 28-kun (ikkinchi doza qilinganidan keyingi 7-kun) samaradorlik 91,4 foizni tashkil etdi. Birinchi dozadan keyingi 42-kunda ko‘ngillilar to‘g‘risida dastlabki ma’lumotlar (ikkinchi dozadan keyingi 21-kunga to‘g‘ri keladi), ko‘ngillilarda barqaror immunitet shakllantirgan bo‘lsa, emlash samaradorligini 95 foizdan yuqori ekanligini ko‘rsatgan”, — deyiladi xabarda.
Shuningdek, 2021-yilda xorijda 500 million kishi uchun 1 milliard dozada “Sputnik V” vaksinasi ishlab chiqarilishi haqida xabar berilgan.
Qayd etilishicha, Rossiya to‘g‘ridan to‘g‘ri investitsiyalar jamg‘armasi hozirda bir qator mamlakatlar va kompaniyalar tomonidan ishlab chiqarish quvvatlarini yanada oshirish bo‘yicha qo‘shimcha murojaatlarni ko‘rib chiqmoqda.
Rossiya vaksinasining xalqaro bozorga birinchi yetkazib berilishi 2021-yilning yanvarida kutilmoqda.
Avvalroq “Sputnik V” vaksinasining yaratuvchilari uning samaradorligini 92 foizga baholagandi.
Ma’lumot uchun, AQShning Pfizer kompaniyasi tomonidan yaratilgan vaksinaning dozasi AQSh uchun 19,5 dollarni tashkil etadi (ikkala komponentning qabul qilinishi 39 dollarga tushadi), boshqa bir Amerika kompaniyasi Moderna vaksinasining bir dozasi narxi esa 25-37 dollarni tashkil qiladi.
Eslatib o‘tamiz, AQShning Pfizer kompaniyasi Germaniyaning BioNTech kompaniyasi bilan birgalikda ishlab chiqarilgan COVID-19’ga qarshi vaksinaning samaradorligi 95 foizni tashkil etishini ma’lum qilgandi. Kompaniya ma’lumotlariga ko‘ra, vaksina sinovda qatnashayotgan kishining yoshi, irqi va millatidan qat’i nazar, samarali bo‘lgan. Dastlabki sinov natijalari 90 foiz samaradorlikni ko‘rsatgan. Shuningdek, noyabr oyida Amerikaning Moderna kompaniyasi o‘zining yangi koronavirusga qarshi vaksinasi sinovlarning uchinchi bosqichida 94,5 foiz samaradorlik ko‘rsatgani haqida xabar bergandi. Buyuk Britaniyaning AstraZeneca kompaniyasi vaksinasining o‘rtacha samaradorligi 70 foizni tashkil qilgan.
Izoh (0)