Rossiya prezidenti Vladimir Putin koronavirusga qarshi vaksinalarning sinovlarida ko‘ngilli sifatida ishtirok eta olmaydi, ommaviy emlash kampaniyasi ham hali boshlanmagan. Bu haqda Putinning matbuot kotibi Dmitriy Peskovga tayanib, “RBK” xabar qilgan.
Peskovning tushuntirish berishicha, Vladimir Putin hali COVID-19 koronavirus infeksiyasiga qarshi emlanmagan.
“Rossiyada keng miqyosli vaksinatsiya qilish boshlanmadi. Prezident vaksina sinovlarida ko‘ngilli fuqaro sifatida qatnashmaydi – buning imkoni yo‘q”, — degan Peskov.
Putin Rossiyaning “Sputnik V” vaksinasi ro‘yxatdan o‘tkazilganini 11-avgustda e’lon qilgan. Preparat Moskvadagi Gamaleya nomidagi markazda ishlab chiqilgan. Avgustda Rossiya prezidenti vaksinani qizlaridan biri qabul qilgani haqida gapirgan.
Oradan ikki oy o‘tgach, Rossiyada COVID-19’ga qarshi ikkinchi vaksina — Novosibirskdagi “Vektor” markazining “EpiVakKorona” preparati ishlab chiqildi. Ushbu vaksina ham “Sputnik V” kabi klinik sinovlarning ikkinchi bosqichidan keyin ro‘yxatdan o‘tkazilgan. Hozirda ikkala preparat ham ko‘ngillilar orasida test qilinmoqda va bu yakuniy bosqich.
“Ikkala vaksina ham eng muhim jihatlar bo‘yicha barcha talablarga javob berishini alohida qayd etmoqchiman. Ular mutlaqo xavfsiz va samarador. Asosiy masala ommaviy ishlab chiqarishni tashkil qilishdan iborat”, — degan Putin 20-noyabrda.
Rossiya prezidentining so‘zlariga ko‘ra, Moskvadagi Chumokov markazi tomonidan ishlab chiqilayotgan RAN vaksinasi ham yaqin orada paydo bo‘ladi. Uchala preparat turli texnologiyalar asosida ishlab chiqilgan. “Sputnik V” virusning modifitsiyalashgan gen asosdagi vektor vaksina, “EpiVakKorona” — virusning protektid antigenlari sun’iy sintez qilingan vaksina, Chumakov nomidagi markaz ishlanmasi — selnovirion vaksina, ya’ni o‘ldirilgan yaxlit virus asosida ishlangan.
Izoh (0)