Buyuk Britaniyada lokdaundan keyin mahalliy cheklovlar joriy qilinadi

Buyuk Britaniyada 2-dekabr kuni koronavirus tufayli joriy qilingan umummilliy karantin tugaydi va u mahalliy cheklovlar bilan o‘rin almashadi. Bu haqda mamlakat bosh vaziri Boris Jonson e’lon qildi, deb yozadi “RBK”.

Yangi choralar mart oxirigacha saqlanib qoladi, ularning samaradorligi har ikki haftada baholanib boradi.

Buyuk Britaniya hududlari epidemiologik vaziyatga va cheklovlarning qat’iylik darajasiga qarab uchta turga ajratiladi. Butun mamlakat bo‘ylab chakana savdo va sport zallari ochiladi, pab va restoranlarning kechqurungi 10 gacha ishlashi bo‘yicha cheklovlar olib tashlanadi, ko‘pi bilan olti kishi bo‘lib ochiq havoda uchrashishga ruxsat beriladi.

Qaysi hududda qay darajada cheklovlar joriy qilinishi keyinroq ma’lum bo‘ladi.

Boris Jonsonning aytishicha, hukumat pandemiya sharoitida Rojdestvo bayramini nishonlashning o‘ziga xos xususiyatlarini ko‘rib chiqmoqchi. Bosh vazir odamlar keksa qarindoshlari bilan ko‘rishish qanday xavfga ega ekanligini tushunishi kerakligini aytdi. “Bu virus biz bilan Rojdestvo uchun sulh tuzmaydi”, — dedi u.

Eslatib o‘tamiz, Buyuk Britaniya bosh vaziri Boris Jonson Angliyada 5-noyabrdan 2-dekabrgacha koronavirus tarqalishini to‘xtatish maqsadida umummilliy yakkalanish rejimi amal qilishi haqida noyabr boshida e’lon qilgan edi.

Avvalroq Angliyada karantin qoidalari yumshatilishi fonida 2-dekabrdan boshlab stadionlarga tomoshabinlar kiritilishiga ruxsat berilishi mumkinligi ma’lum qilindi.

So‘nggi ma’lumotlarga ko‘ra, Buyuk Britaniyada 1,5 milliondan ortiq odam COVID-19’ga chalingan. Jons Hopkins universiteti statistikasiga ko‘ra, Buyuk Britaniya kasallanganlar soni bo‘yicha dunyoda 7-o‘rinni egallamoqda.

Dunyoda pandemiya boshidan buyon 59 106 877 kishi COVID-19’ni yuqtirib olgan, 1 395 176 kishi vafot etgan.

Avvalroq Jahon sog‘liqni saqlash tashkilotining COVID-19 bo‘yicha maxsus elchisi Devid Nabarro mamlakatlar infeksiyaga qarshi kurash uchun zarur infratuzilmani yaratmasa, Yevropada koronavirus tarqalishining uchinchi to‘lqini ko‘tarilishi mumkinligini ma’lum qilgan edi.