Andijon viloyatida so‘nggi ikki yil davomida 17 milliard so‘mdan ortiq budjet mablag‘lari talon-toroj qilingani aniqlanib, buning uchun 30 nafar mansabdor shaxs jinoiy javobgarlikka tortilgan. Bu haqda “Daryo” muxbiri Umidjon Mamarasulov xabar berdi.
Ma’lum bo‘lishicha, 2020-yil 23-noyabr kuni viloyat hokimligida o‘tkazilgan idoralararo yig‘ilishda viloyat prokurori G‘ayrat Fozilovning axboroti tinglangan. Unda ayrim tashkilot va idoralarda korrupsion qonun buzilishlar, poraxo‘rlik va o‘z shaxsiy manfaatini ustun qo‘yib, berilgan ishonchni suiiste’mol qilish holatlari uchrayotganligi ta’kidlangan.
Viloyat prokurorining aytishicha, so‘nggi ikki yil davomida viloyat bo‘yicha 139 nafar mansabdor turli ko‘rinishdagi korrupsion jinoyatlarni sodir etganligi uchun javobgarlikka tortilgan. Bunday jinoyatlar oqibatida esa yetkazilgan moddiy zarar miqdori 18 milliard so‘mdan oshgan.
“Iqtisodiy sohadagi korrupsiya haqida so‘z yuritganda, avvalo, budjet mablag‘laridan maqsadli va oqilona foydalanish yil sayin dolzarb muammoga aylanib borayotganligini tashvish bilan ta’kidlamoqchiman. Zero, tahlillar eng quyi pog‘onadan tortib to yuqorigacha budjet pullarini talon-toroj qilishning turli korrupsiyaviy sxemalari keng ildiz otganligini ko‘rsatmoqda. Ahamiyat bering, so‘nggi ikki yilda viloyat bo‘yicha 17 milliard so‘mdan ortiq budjet mablag‘larini talon-toroj qilish holatlari aniqlanib, bu qilmishlari uchun 30 nafar shaxs jinoiy javobgarlikka tortilgan. Bunday holatlar, asosan, qurilish, bank, energetika sohalariga to‘g‘ri keladi. Hududlar kesimida oladigan bo‘lsak, iqtisodiy jinoyatlarning 90 foizga yaqini Andijon shahri (16,4 mlrd)da qayd qilingan. Shuningdek, Xo‘jaobod (61,5 mln), Asaka (162,8 mln), Jalaquduq (724 mln), Marhamat (287 mln), Oltinko‘l (135 mln), Buloqboshi (137 mln) tumanlarida shu kabi jinoyatlarning ortganini kuzatishimiz mumkin”, — dedi viloyat prokurori G‘ayrat Fozilov.
Fozilov budjet mablag‘larining ratsional taqsimlanishi va maqsadli ishlatilishi yuzasidan davlat nazoratiga mas’ul moliya organlari o‘ziga yuklatilgan vazifalarni talab darajasida bajarmayotganligini ham aytib o‘tgan. Uning aytishicha, 2019—2020-yillar davomida huquqni muhofaza qiluvchi organlar tashabbusi bilan o‘tkazilgan tekshirishlar natijasida 17,3 milliard so‘mlik talon-torojliklar fosh etilgan bir paytda davlat moliyaviy nazorati viloyat boshqarmasi tashabbusi bilan 4,8 milliard so‘mlik talon-toroj qilish holati aniqlangan.
Eslatib o‘tamiz, avvalroq 2020-yilning 9 oyi davomida huquqni muhofaza qiluvchi organlar tomonidan jami 838 ta korrupsiya holati yuzasidan jinoyat ishlari qo‘zg‘atilgani xabar berilgandi.
Mavzuga doir:
- Hokimliklarda korrupsiya ko‘paysa ko‘payyaptiki, lekin kamayishidan darak yo‘q — O‘zbekiston bosh prokurori
- Qashqadaryoda fermerlarning 45 mln so‘m pulini talon-toroj qilgan bank xodimiga sud hukmi o‘qildi
- Andijonda hokimlik vakili noqonuniy ravishda o‘zlashtirgan binoni buzib tashlab, qurilish materiallarini 760 mln so‘mga sotib yuborgani ma’lum qilindi
Izoh (0)