O‘zbekiston bog‘cha vazirligi Maqsud Yo‘ldoshevning “Obqochishga majburmiz” degan so‘zlariga izoh berdi

Oliy Majlis Qonunchilik palatasining 18-noyabr kuni o‘tkazilgan navbatdagi majlisida davlat-xususiy sherikchiligi to‘g‘risidagi savollarga javob qaytargan maktabgacha ta’lim vaziri o‘rinbosari Maqsud Yo‘ldoshev o‘chirishni unutib, “Obqochishga majburmiz endi, nima qilamiz?”, degan so‘zlari to‘g‘ridan to‘g‘ri efirga ketgandi.

Majlis Youtube orqali jonli efirga uzatilayotgan bo‘lgan. Maqsud Yo‘ldoshev o‘sha paytda qo‘ng‘iroq qilgan Xurshid ismli shaxsga javob bergan va, katta ehtimol bilan, deputatlarning savollariga bergan o‘z javoblarini nazarda tutgan.

Holat yuzasidan Maktabgacha ta’lim vazirligi matbuot kotibi Mavluda Asqarxo‘jayevaning ma’lum qilishicha, haqiqatan ham Maqsud Yo‘ldoshev deputatlar savollariga javob bergandan so‘ng onlayn uzatilayotgan efir mikrofonini o‘chirishni esidan chiqarib, ish faoliyatini davom ettirgan hamda bu jarayonda unga bo‘lgan qo‘ng‘iroqqa javob bergan.

“Vazir o‘rinbosari Maqsud Yo‘ldoshev bu telefon orqali so‘zlashuv mazmuni deputatlarga berilgan javobga aloqasi yo‘qligini ma’lum qildi. Shu munosabat bilan, ommaviy axborot vositalari vakillaridan turli xil ‘ehtimollar’ga asoslangan fikrlarini ilgari surmasliklari va vaziyatga to‘g‘ri baho berishlarini so‘raymiz”, — deyiladi vazirlik matbuot kotibi axborotida.

Oliy Majlis Qonunchilik palatasi deputati Rasul Kusherbayev vazir o‘rinbosarining bu xatti-harakati shunday munosabat bildirgan: “Maktabgacha ta’lim vaziri o‘rinbosari o‘zi bilmagan holda ish tizimi bo‘yicha bor haqiqatni ochib qo‘ydi: tizim olib qochishga moslashgan. Bugun deputatlarni aldab olib qoching, ertaga Prezidentni aldab olib qoching, keyin xalqni aldab olib qoching”.

Eslatib o‘tamiz, 2017-yilda “Milliy tiklanish” demokratik partiyasi deputati Dilfuza Jalilova “O‘zbekiston” telekanalining “Munosabat” ko‘rsatuvidagi muloqot chog‘ida Vobkent tumanidagi Chashmai Ayyub maqbarasida hech qanday ish olib bormagani to‘g‘risidagi savolga “Bor, bor, bor rolimiz” deya javob qaytarib, partiyadoshi tomon burilib, ko‘z qisib qo‘ygani to‘g‘ridan to‘g‘ri efirda ketib qolgan edi.