Олий Мажлис Қонунчилик палатасининг 18 ноябрь куни ўтказилган навбатдаги мажлисида давлат-хусусий шерикчилиги тўғрисидаги саволларга жавоб қайтарган мактабгача таълим вазири ўринбосари Мақсуд Йўлдошев ўчиришни унутиб, «Обқочишга мажбурмиз энди, нима қиламиз?», деган сўзлари тўғридан-тўғри эфирга кетганди.
Мажлис Youtube орқали жонли эфирга узатилаётган бўлган. Мақсуд Йўлдошев ўша пайтда қўнғироқ қилган Хуршид исмли шахсга жавоб берган ва, катта эҳтимол билан, депутатларнинг саволларига берган ўз жавобларини назарда тутган.
Ҳолат юзасидан Мактабгача таълим вазирлиги матбуот котиби Мавлуда Асқархўжаеванинг маълум қилишича, ҳақиқатан ҳам Мақсуд Йўлдошев депутатлар саволларига жавоб бергандан сўнг онлайн узатилаётган эфир микрофонини ўчиришни эсидан чиқариб, иш фаолиятини давом эттирган ҳамда бу жараёнда унга бўлган қўнғироққа жавоб берган.
«Вазир ўринбосари Мақсуд Йўлдошев бу телефон орқали сўзлашув мазмуни депутатларга берилган жавобга алоқаси йўқлигини маълум қилди. Шу муносабат билан, оммавий ахборот воситалари вакилларидан турли хил ‘эҳтимолларъга асосланган фикрларини илгари сурмасликлари ва вазиятга тўғри баҳо беришларини сўраймиз», — дейилади вазирлик матбуот котиби ахборотида.
Олий Мажлис Қонунчилик палатаси депутати Расул Кушербаев вазир ўринбосарининг бу хатти-ҳаракати шундай муносабат билдирган: «Мактабгача таълим вазири ўринбосари ўзи билмаган ҳолда иш тизими бўйича бор ҳақиқатни очиб қўйди: тизим олиб қочишга мослашган. Бугун депутатларни алдаб олиб қочинг, эртага Президентни алдаб олиб қочинг, кейин халқни алдаб олиб қочинг».
Эслатиб ўтамиз, 2017 йилда «Миллий тикланиш» демократик партияси депутати Дилфуза Жалилова «Ўзбекистон» телеканалининг «Муносабат» кўрсатувидаги мулоқот чоғида Вобкент туманидаги Чашмаи Айюб мақбарасида ҳеч қандай иш олиб бормагани тўғрисидаги саволга «Бор, бор, бор ролимиз» дея жавоб қайтариб, партиядоши томон бурилиб, кўз қисиб қўйгани тўғридан-тўғри эфирда кетиб қолган эди.
Изоҳ (0)