Andijonda o‘zganing telefonini o‘g‘irlashga uringan yigit qo‘shnisining Cobalt’ida devorga borib urildi

Andijon viloyatida 23 yoshli fuqaroning telefonini olib qochishga uringan Cobalt haydovchisi devorga urilib, yo‘l-transport hodisasini sodir etdi. Bu haqda Tergov departamenti xabar berdi.

Ma’lumotlarga ko‘ra, 2-noyabr kuni soat taxminan 23:00 larda 23 yoshli Shohjahon ismli shaxs Andijon tumani “Qumko‘cha” MFY hududidan o‘tgan Andijon—Bog‘ishamol transport qatnov yo‘lida 22 yoshli Asliddin ismli fuqaroga tegishli RedMi Note 8 rusumli telefon apparatini foydalanish maqsadida olgan. U telefonni ochiqdan ochiq talon-toroj qilib, boshqaruvida bo‘lgan davlat raqamisiz Cobalt rusumli avtomashinaga o‘tirib, hodisa joyidan qochishga uringan vaqtida boshqaruvni yo‘qotib, devorga borib urilgan. Natijada talonchilik sodir qilgan Shohjahon YTH natijasida qovurg‘a suyaklari sinishi ko‘rinishida o‘rtacha og‘irlikdagi tan jarohatlari olgan.

Tergovga qadar tekshiruv jarayonida aniqlanishicha Shohjahon o‘sha kuni qo‘shnisiga tegishli bo‘lgan avtomashinani dorixonaga chiqib kelish maqsadida olib turgan.

Mazkur holat yuzasidan Andijon tumani IIB huzuridagi Tergov bo‘limi tomonidan unga nisbatan Jinoyat kodeksining 166-moddasi 1-qismi (talonchilik) bilan jinoyat ishi qo‘zg‘atilib, olib qochilgan uyali telefon apparati ashyoviy dalil sifatida rasmiylashtirib olingan.

Hozirda jinoyat ishi yuzasidan dastlabki tergov harakatlari olib borilmoqda.

Avvalroq Qashqadaryoda haydovchiga tahdid qilib, unga tan jarohati yetkazgan va avtomobilini tortib olgan er-xotinga sud hukmi o‘qilgani to‘g‘risida xabar berilgandi.