Эрон келаси шанба, 21 ноябрдан бошлаб пандемия сабабли қатъий чекловларни жорий қилади. «Коммерсантъ»нинг хабар беришича, бу ҳақда давлат телевидениеси орқали Эрон президенти Ҳасан Руҳоний эълон қилди. Энг кескин чоралар Теҳронда ва бошқа 100 га яқин шаҳар ва қишлоқларда жорий этилади.
Эрон соғлиқни сақлаш мутасаддилари мамлакатдаги коронавирус эпидемиясининг оғирлик даражасини рангли кодлаш тизимини ишлаб чиқди. Энг юқори даража қизил ёки учинчи даража деб белгиланади.
Тахминан 150 та шаҳар ва аҳоли яшаш жойлари оловранг ёки иккинчи даража билан белгиланган. Уларда ишчиларнинг учдан бири иш жойига бориши мумкин. Биринчи даражали (сариқ) деб топилган жойлар — 155 та шаҳарда ходимларнинг учдан икки қисми ўз иш вазифаларини бажариши мумкин.
«Чекловлар нафақат иш жойлари, балки университет, мактаб ва ўқув марказларини ҳам қамраб олади», — деган Руҳоний. «Қизил ва оловранг шаҳарларда таълим масофавий тарзда амалга оширилади», — деб таъкидлаган Эрон президенти.
Эронда 750 мингга яқин киши коронавирусга чалинган, 41 мингдан ортиғи вафот этган. Сўнгги сутка давомида 11 мингдан ортиқ янги касалланиш ҳолатлари аниқланган. Эрон Тиббиёт фанлари университети фуқароларда COVID-19 коронавирусига қарши иккита вакцинани синовдан ўтказишни бошлади. Тадқиқотлар учун етарли даражада муносиб номзодлар жалб қилинган.
Жонс Ҳопкинс университети маълумотларига кўра, дунёда коронавирус билан касалланганлар сони 53 миллиондан ошди. Ноябрь ойининг бошидан бери COVID-19 билан касалланганлар сони 7 миллионга кўпайган. Касалланганлар сони ортиши бўйича АҚШ ҳамон етакчилик қилмоқда.
ЖССТ маълумотларига кўра, ўтган бир ҳафта ичида дунё бўйлаб 3,6 миллион киши коронавирусга чалингани қайд этилди. Янги касалланиш ҳолатларининг 54 фоизи Европада аниқланган. Шу сабабли кўплаб мамлакатларда чеклов чоралари кучайтирилмоқда.
Хусусан, Италиянинг барча ҳудудида коронавирус сабабли комендантлик соати жорий этилгани, Парижда COVID-19 туфайли тунда озиқ-овқат етказиб бериш ва спиртли ичимликлар сотиб олиш тақиқланди, Туркия кўчаларида коронавирус сабаб сигарет чекиш тақиқланди, Латвияда коронавирус сабаб фавқулодда ҳолат эълон қилинди. Руминияда 9 ноябрдан бир ойга комендантлик соати ва мажбурий ниқоб тақиш режими, Грузиянинг йирик шаҳарларида ҳам коронавирус туфайли комендантлик соати жорий қилинди. Австрияда эса 17 ноябрдан тўлиқ локдаун жорий қилинади.
Коронавирусга қарши курашиш штаби аъзоси Нурмат Отабеков 14 ноябрь куни ўтказилган брифингда «Ўзбекистонда коронавирус билан боғлиқ вазият яна мураккаблашиши эҳтимоли йўқ эмас»лигини айтганди.
Изоҳ (0)