O‘zbekiston Prezidenti 12-noyabr kuni Qashqadaryo viloyatiga qilgan safari mobaynida Qarshi shahridagi Korxonalarni sog‘lomlashtirish va xususiylashtirish klinikasiga ham tashrif buyurib, uning faoliyati bilan tanishdi. Klinikada viloyatdagi yirik korxonalar va tadbirkorlar tomonidan ishlab chiqarilayotgan mahsulotlarning doimiy ko‘rgazmasi tashkil etilgan. Majlislar zali, muzokara xonalari, eksportchilar uyushmasi va o‘quv markazlari ham joylashtirilgan. “Daryo” muxbiri Mirolim Isajonov Davlat aktivlarini boshqarish agentligi direktori Sunnatilla Bekenov bilan suhbatlashib, klinikani yo‘lga qo‘yishdan maqsad, uning vazifalari va ahamiyatiga oid savollarga javob oldi.
“Xususiylashtirishdan maqsad - tadbirkorlarga yo‘l ochish”“Prezidentimiz joriy yilning 27-oktabr kuni “Davlat ishtirokidagi korxonalarni isloh qilishni jadallashtirish hamda davlat aktivlarini xususiylashtirishga oid chora-tadbirlar to‘g‘risida”gi farmonga imzo qo‘ydi. Shundan so‘ng 28-oktabr kuni o‘tkazilgan videoselektor yig‘ilishida davlatimiz rahbari bu borada aholiga batafsil ma’lumot beradigan maslahat klinikalari hamda Call-markaz tashkil etish zarurligini ta’kidlagan edi. Ushbu hujjat odamlarda turli fikrlarni uyg‘otyapti: bezovtaliklar ham, xursandchiliklar ham bor. Xususiylashtirishdan asosiy maqsad - faoliyat yuritayotgan davlat korxonalarini yanada samarali ishlashini ta’minlash hamda tadbirkorlarga yo‘l ochib berishdir. O‘zingiz yaxshi bilasiz, agar davlatning bozordagi ulushi qancha ko‘p bo‘lsa, u shuncha korxonalarga yaqin ko‘maklashuvchi va tadbirkorlarga to‘siq ham bo‘ladi. Misol uchun, yuqorida turuvchi idora va vazirliklar biror xizmatga ehtiyoj sezsa, xususiy sektorga emas, balki, davlat unitar korxonasiga murojaat qiladi. Natijada raqobat muhiti va sifat yo‘qoladi. Sifat yo‘q bo‘lsa, tabiiyki, tannarx ham o‘sadi. Shunday ekan, davlat aktivlarini xususiylashtirish iqtisodiyot uchun faqat manfaat keltiradi”.
“Shaffoflik ta’minlanadi”“Davlat mulki talon-toroj bo‘lmaydimi?”, “Xususiylashtirish jarayoni shaffof o‘tadimi, tanish-bilishchilikka yo‘l qo‘yilmaydimi?”, kabi savollar ham odamlarda shubha, xavotir uyg‘otayotgani bor gap. Davlat mulki bu – xalq mulki. Shunday ekan, binolar xususiylashtirilib, sotilayotganida ham, investorlarga berilayotganida ham, albatta, shaffoflik ta’minlanadi. Bu kabi savollarga javob topish va jarayonning ochiq-oydin o‘tkazish maqsadida yurtimizning barcha viloyat markazlarida korxonalarni sog‘lomlashtirish va xususiylashtirish klinikalari tashkil etilyapti. Shuni alohida ta’kidlash joizki, xususiylashtirishdan maqsad budjetga pul tushirish emas, davlat pul uchun korxonalarni sotib yubormayapti. Balki, korxonani yanada sog‘lomlashtirib, raqobatbardosh mahsulot ishlab chiqarishga aylantirishdir”.
“Muammolarni hal qilishga yaqindan ko‘maklashadi”“Mahsulot ishlab chiqarishdagi qator qiyinchiliklar, investor topolmaslik, bankdan kredit ololmaslik singari turli muammolar oxir-oqibat tadbirkorning ahvolini qiyinlashtiradi, ya’ni nosog‘lom muhitga olib keladi. Yurtimizda muammoga duch kelgan ishbilarmonlar o‘z dardini borib aytadigan savdo-sanoat palatasi, biznes ombudsman, bosh vazir qabulxonalari, “Tadbirkor ayol” O‘zbekiston ishbilarmon ayollar assotsiatsiyasi kabi ko‘plab tashkilotlar faoliyat yuritadi. Lekin ular tadbirkorni qiynayotgan masalani tegishli mutasaddi vazirliklarga yetkazadi. Natijada har doim ham ishbilarmonning muammosi tezkor yechim topmaydi, tadbirkor murojaati ortidan sarson yuraveradi. Bu kabi klinikalar esa muammolarni hal qilishga yaqindan ko‘maklashadi. Avvalo, har qanday muammoning sababi va oqibatlari chuqur tahlil qilinib, oqibat bilan emas, sababga qarshi kurashiladi. Klinikaga barcha soha vakillari chaqirtirilib, muammoga birgalikda yechim topiladi”.
“Klinikalar faoliyati barcha viloyatda yo‘lga qo‘yildi”“Korxonalarni sog‘lomlashtirish va xususiylashtirish klinikalari Qoraqalpog‘iston, Toshkent shahri va barcha viloyatlarda ochilgan. Shuningdek, kunu tun ishlaydigan 1082 raqamli Call-markaz ham yo‘lga qo‘yildi. Mazkur klinikalar Davlat aktivlarini boshqarish agentligi va uning hududiy organlari tomonidan boshqariladi. Ularning faoliyatida Savdo-sanoat palatasi, bosh vazir qabulxonasi, Investitsiyalar va tashqi savdo vazirligi, Iqtisodiy taraqqiyot va kambag‘allikni qisqartirish vazirligining hududiy boshqarmalari va hokimlik vakillari doimiy ishtirok etadi. Bundan tashqari, so‘rovga asosan boshqa vazirlik va idoralar, tijorat banklari xodimlari ham jalb etilishi mumkin”.
“Hamma xizmatlar bepul”“Qashqadaryo viloyatida faoliyatini to‘xtatgan yoki yopilish arafasida turgan, soliqdan muddati o‘tgan qarzi bor, mahsuloti sotilmay, yig‘ilib qolayotgan mingtaga yaqin korxonalar mavjud. Ularning barchasi sog‘lomlashtirishga muhtoj. Yaqinda faoliyatini boshlagan klinikada mazkur korxonalar chuqur tahlil qilinib, ularni yana avvalgidek ishlashiga ko‘maklashiladi.
Qarshi shahridagi mazkur klinikada iqtisodiy-moliyaviy va yuridik maslahatlar berish, informatsion xizmatlar ko‘rsatish uchun barcha sharoit yaratilgan. Malakali mutaxassislar biriktirilib, infokiosklar o‘rnatilgan. Bu yerda xususiylashtirishga qo‘yilgan obyektlar, ularning manzili, holati, sohadagi tartib-qoidalar haqida batafsil ma’lumot olish mumkin. Hamma xizmatlar bepul. Tadbirkorlarga davlat aktivlarini sotib olish, korxonalarni xususiylashtirishga oid savollarga javob olish va muammolarni hal qilishda amaliy ko‘mak ko‘rsatiladi. Prezidentimiz bu tizimni yanada takomillashtirish, yangi xizmat turlarini yo‘lga qo‘yish, bir so‘z bilan aytganda, aholiga va tadbirkorlarga qulaylik yaratish borasida topshiriqlar berdi. Biz shunday muhit yaratishimiz kerakki, toki har bir fuqaro bu klinikaga kelib, muammosini shu yerning o‘zida hal qilsin. Ortiqcha vaqt va mablag‘ sarflamasin”.
Mavzuga doir:
Izoh (0)