Muxtor Hayitmurodov Nishon tumani “qizil” hududdan qachon va qanday yo‘l bilan chiqishini ma’lum qildi

Nishon tumani mahalliy budjetida 2015-yilda umuman mablag‘ qolmas edi. Hokimlarga qo‘shimcha mablag‘lar tushirish va ishlatish imkoniyati berilgach, ushbu hudud iqtisodiyoti ham rivojlana boshladi. 2020- yilning yanvar—sentabr oyida tuman budjetiga 6 milliard so‘m qo‘shimcha mablag‘ tushdi. To‘rtinchi chorakda yana 4 milliard so‘m tushishi kutilmoqda. Bu haqda tuman hokimi Muxtor Hayitmurodov “Daryo” muxbiri Mirolim Isajonovga bergan intervyusida ta’kidlab o‘tdi.

“Joriy yil yakuniga qadar tuman budjetiga jami 10 milliard so‘m qo‘shimcha mablag‘ tushishi rejalashtirilgan. Mazkur pullar tuman hokimi va xalq deputatlari tuman Kengashining qarorlariga asosan hududning zarur ehtiyojlariga yo‘naltiriladi. Buni davlatimiz rahbari tomonidan hokimlarga berilgan imkoniyat, izchil islohotlar olib borish uchun yaratilgan sharoit, deb bilaman.

Tumanimiz 2019-yil yakunlari bo‘yicha “qizil” hududga tushgan edi. Hudud iqtisodiyotida yirik korxona hisoblangan Tolimarjon issiqlik stansiyasi ko‘rsatkichlari tuman ko‘rsatkichining 60-65 foizini tashkil etadi. Bu reyting joriy qilinmasdan oldin ushbu katta korxona hisobidan ko‘rsatkichlarni yopib yurganmiz. Korxona hisob-kitobi Nishon tumanidan chiqarilganidan so‘ng bizning haqiqiy ahvolimiz ma’lum bo‘ldi”, — dedi Hayitmurodov.

Uning ma’lum qilishicha, 2020-yil yakunigacha Nishon tumani “qizil” hududdan chiqishi kutilmoqda.

“Tumanni “qizil” hududdan chiqarib, “sariq” va “yashil” hududga o‘tkazishga mo‘ljallangan “yo‘l xaritasi”ni ishlab chiqish jarayonida barcha imkoniyatlarimizni chuqur tahlil qildik. Birinchi navbatda, chorvachilikni rivojlantirishga jiddiy kirishmoqchimiz. Prezidentimiz Kasbi, Mirishkor, Koson tumanlari qatori Nishonni ham chorvachilikka ixtisoslashtirib, yirik komplekslar va kichik bo‘rdoqichilik fermalari tashkil etish, ozuqa bazasi uchun yer ajratish vazifasini qo‘ydi. Bu sohani yo‘lga qo‘yish uchun ming gektar yer ajratdik. Keyingi yilda 4 ming bosh naslli qora mol va 8 ming bosh mayda shoxli mol olib kelish evaziga sutni qayta ishlashni 5 ming tonna, go‘shtni qayta ishlashni esa 1 ming tonnaga oshirmoqchimiz.

Shuningdek, meva-sabzavotchilikni ham rivojlantirish rejamizda bor. 1300 gektar yerni tadbirkorlarga ajratib berdik. Ular tomonidan 30 ming tonna atrofida qo‘shimcha mahsulot yetishtiriladi. 5 ming tonnadan ziyod meva-sabzavotlarni qayta ishlaydigan va saralaydigan 5 ta loyihani amalga oshiramiz. Chorvachilik va meva-sabzavotchilikni rivojlantirish orqali 2 ming 700 ga yaqin yangi ishchi o‘rni yaratiladi va tumanda 35 milliard so‘m qo‘shimcha sanoat mahsulotlari ishlab chiqariladi. Natijada aholi jon boshiga ishlab chiqarilgan mahsulot hajmi ham keskin oshadi.

Nishon tumanini “qizil” hududdan chiqarish maqsadida ishlab chiqilgan “yo‘l xaritasi” bo‘yicha 2020-yilning yakuni bilan “sariq” hududga, 2021-yil oxirida esa “yashil” hududga o‘tishni rejalashtirganmiz. Ayni paytda bu borada jiddiy ishlar olib boryapmiz”, dedi Nishon tumani hokimi.

Eslatib o‘tamiz, avvalroq 2019-yil yakunlari bo‘yicha hududlarni ijtimoiy-iqtisodiy rivojlantirish darajasini baholash reytingida Nishon tumani 13 ta ko‘rsatkich bo‘yicha boshqa hududlardan past natija ko‘rsatib, “qizil” hududga tushib qolgani, baholashning asosiy 21 ta ustuvor yo‘nalishidan 8 tasi bo‘yicha past ko‘rsatkich qayd etilgani haqida xabar berilgan edi.