Американинг Виржиния штатидаги Хоупуэлл шаҳрида яшовчи беш яшар қиз ўзи тез ёрдам чақириб, тиббий ёрдамга муҳтож онасини ҳаётини сақлаб қолди. Бу ҳақда «11 WJHL» телеканалининг сайти хабар беради.
2020 йилнинг 8 ноябрь куни 39 ёшли Лашонасти Тарбервилл 5 яшар қизалоғи Девеа Боксли билан уйда ёлғиз бўлган. Тўсатдан Тарбервилл ўзини ёмон ҳис қила бошлайди. «Иситма кучайди, қаттиқ терладим ва кўнглим айний бошлади. Бошим айланганлиги учун ётиб олдим», − дейди Тарбервилл.
Шу пайт унинг қизалоғи онасига нима бўлаётганини кўрди ва унинг аҳволи хавотир оларли даражада эканлигини сезди. «У менга гапирганини эслайман: «Ойи, бирор нарса денг», − дейди Тарбервилл. Аёлда на қимирлашга ва на гапиришга куч бор эди.
Шундан сўнг Девеа онасининг телефонини топишга уринди. У телефонни олиб, тез тиббий ёрдамга қўнғироқ қилди ва диспетчерларга вазиятни тушунтиришга муваффақ бўлди.
Шифокорлар келгунига қадар қиз онасига сув келтирди ва унинг бошини силаб ўтирди. Чақирув бўйича келган тиббиёт ходимлари Тарбервиллни тез ёрдам машинасига жойлаштириб, маҳаллий касалхонага олиб кетди.
Шифокорларнинг маълум қилишича, Тарбервиллда гипогликемик реакция юз берган. Унинг қондаги қанд миқдори хавф туғдирадиган даражада пасайиб кетган. Шунингдек, аёлнинг ҳозирги аҳволи анча яхши.
«Девеа – менинг жажжи қаҳрамоним. У вазиятдан эсанкираб қолмади. Ўзини жиддий тутди ва йиғламади», − дейди унинг онаси. Аёлнинг сўзларига кўра, Девеа аввалданоқ тез тиббий ёрдам чақиришга ўргатилган бўлиши мумкин, сабаби у олдин бувиси билан бирга яшаган.
Изоҳ (0)