Бухоро вилоят ИИБ Эксперт криминалистика бўлими 2020 йилнинг 11 ноябрь куни соф вазни 1479 грамм бўлган гиёҳвандлик моддасини сотишни мақсад қилган жиноий гуруҳни қўлга олди. Бу ҳақда «Дарё»га вилоят ИИБ ахборот хизмати раҳбари Шуҳрат Жалолов хабар берди.
Таъкидланишича, Бухоро шаҳрида яшовчи 63 ёшли С.И. уйида бир дона оқ рангли қоп, бир дона бўёқ идиши ҳамда 88 дона гугурт қутиларга жойланган жами 1479 граммга тенг марихуанна гиёҳвандлик моддасини қонунга хилоф равишда сотишни мақсад қилиб, сақлаб келган.
Бухоро ИИБ тезкор гуруҳи вакиллари томонидан ушбу ҳолат бўйича терговга қадар текширув ўтказилган.
Аниқланишича, С.И. ушбу гиёҳвандлик моддаларини 43 ёшли таниши фуқаро А.Р.дан 1,5 миллион сўм эвазига харид қилган ва келгусида уни сотиб, мўмай даромад орттиришни мақсад қилган.
С.И.нинг кўрсатмаси асосида фуқаро А.Р.нинг яшаш хонадонида ҳам терговга қадар текширув ҳаракатлари олиб борилган.
«Тезкор тадбир жараёнида фуқаро А.Р.нинг ёнлари холислар иштирокида кўздан кечирилди. Унинг устки кийими ён чўнтакларидан 9 дона гугурт қутиларга жойланган, шунингдек, яшаш хонадонининг молхонасидаги ҳашаклар орасидан уч дона қоғозга ўралган марихуанна топилди. Соф вазни 71 граммни ташкил қилган ушбу гиёҳванд модда холислар иштирокида ҳужжатлаштириб олинди. Бу бир гуруҳ шахслар ўзаро тил бириктириб, бу гиёҳванд моддаларни сотиб, мўмай даромад топиш мақсадини кўзлашгани фош этилди», — дейди Шуҳрат Жалолов.
Мазкур ҳолатлар юзасидан Бухоро шаҳар Ички ишлар органлари фаолиятини мувофиқлаштириш бошқармаси ҳузуридаги тергов бўлими томонидан жиноят устида қўлга олинган С.И. ва А.Р.га нисбатан Жиноят кодексининг 25-моддаси (жиноятга тайёргарлик кўриш ва жиноят содир этишга суиқасд қилиш), 273-моддаси 5-қисми (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек, уларни қонунга хилоф равишда ўтказиш) билан жиноят иши қўзғатилган.
Ҳозирда дастлабки тергов ҳаракатлари олиб борилмоқда.
Изоҳ (0)