Toshkent shahar hokimligi huzuridagi raqamli situatsion markaz qurilishiga taxminan 100,2 milliard so‘m (Markaziy bankning 12-noyabrdagi kursi bo‘yicha 9,6 million dollardan ortiq) ajratilmoqda. Bu haqda davlat xaridlari portalidagi ma’lumotlarga tayanib, “Gazeta.uz” xabar berdi.
Markazning shahar ma’muriyati hududida qurilishi Prezidentning 17-martdagi farmonida (PQ-4642) ko‘zda tutilgan.
Toshkent shahar hokimiyatining “Yagona buyurtmachi xizmati” injiniring kompaniyasi davlat budjeti mablag‘lari hisobidan moliyalashtiriladigan ushbu loyihaning buyurtmachisi hisoblanadi. Obyekt qurilishiga 2020-yil oxiriga qadar 32,6 milliard so‘m, 2021-yilda 67,6 milliard so‘mlik mablag‘ ajratish rejalashtirilgan. 23-oktabr holatiga ko‘ra 9,7 milliard so‘m miqdoridagi avans to‘lovi moliyalashtirilgan, shuningdek, materiallarni sotib olish uchun yana 10 milliard 0 so‘m miqdorida avans o‘tkazish rejalashtirilgan.
Loyiha pudratchisi Power Construction Planet MChJ bo‘lib, kompaniya bilan shartnoma 7-oktabrda imzolangan. Vazirlar Mahkamasining 9-sentabrdagi 401-f-sonli farmoyishi bilan loyihani tanlovsiz amalga oshirishga ruxsat berildi. Nashrning yozishicha, hukumat farmoyishlarini 28-maydan boshlab Qonunchilik ma’lumotlari milliy bazasida nashr etish to‘xtatilgan
Korxonalar va tashkilotlarning yagona davlat reyestri ma’lumotlariga ko‘ra, Power Construction Planet MChJ 2008-yil 12-sentabrda ro‘yxatdan o‘tgan. Kompaniyaning 66,9 foiz ulushiga Ismoil Isroilov, 33,1 foiziga Abdurasul Zohidov egalik qiladi.
Ismoil Isroilov ilgari Akfa Engineering and Managemen kompaniyasining direktori va direktor o‘rinbosari bo‘lib ishlagan va bir qator kompaniyalarning ulushlariga ega bo‘lgan. Abdurasul Zohidov 2020-yil yanvar oyi boshida Discover Invest MChJ direktori sifatida “Do‘stlik” ordeni bilan taqdirlangan. Discover Invest MChJ Tashkent City va Ashxobod parklarini, Hilton mehmonxonasi, kongress-markaz, Imzo va Artel, Akfa Medline va boshqa korxonalar binolarini qurgan.
Loyihani ishlab chiquvchi vazifasi Prime Tower Group MChJ ga topshirilgan. Uning ta’sischilari esa Jasur Bahodirovich Badalov (35 foiz), Sardor Xabarjonovich Ummatov (30 foiz) va Artur Damirovich Nuriyev (35 foiz) hisoblanishadi.
Shu bilan birga, Power Construction Planet Toshkent viloyatining Zangiota tumanida 2160 o‘rinli ixtisoslashtirilgan karantin zonasini qurish bilan ham shug‘ullangan. Obyektning qiymati 39,2 milliard so‘mga baholangan. Shuningdek, loyihani Vazirlar Mahkamasining 23-iyuldagi 337-f-sonli farmoyishi asosida tanlovsiz amalga oshirishga ruxsat berilgan.
Toshkentda situation markaz yaratish rejasi haqida 2018-yilning aprel oyida ma’lum bo‘lgan. O‘shanda Janubiy koreyalik mutaxassis, Seul shahri meriyasi vakili Kim Yu Shik shahar hokimining poytaxt ma’muriyati ishi tizimiga axborot-kommunikatsiya texnologiyalarini joriy qilish bo‘yicha maslahatchisi etib tayinlangandi.
“Maslahatchining asosiy vazifalari — Toshkentda ham Seuldagidek shahar boshqaruvi bo‘yicha situatsion markaz yaratilishidan iborat. Yagona markaz orqali shaharda kommunal soha, shaharsozlik, yong‘in xavfsizligi, tezkor choralar ko‘rish tizimlaridagi barcha vaziyatlarni onlayn rejimda kuzatish mumkin. Unga ko‘chalardagi barcha kuzatuv kameralari ham ulanadi. Buni Smart City unsurlaridan biri deya hisoblash ham mumkin, ammo bu mutlaqo alohida loyiha”, — deya ta’kidlagandi shahar hokimining o‘sha vaqtdagi o‘rinbosari Alisher Tillayev.
Izoh (0)