Тошкент шаҳар ҳокимлиги ҳузуридаги рақамли ситуацион марказ қурилишига тахминан 100,2 миллиард сўм (Марказий банкнинг 12 ноябрдаги курси бўйича 9,6 миллион доллардан ортиқ) ажратилмоқда. Бу ҳақда давлат харидлари порталидаги маълумотларга таяниб, «Gazeta.uz» хабар берди.
Марказнинг шаҳар маъмурияти ҳудудида қурилиши Президентнинг 17 мартдаги фармонида (ПҚ-4642) кўзда тутилган.
Тошкент шаҳар ҳокимиятининг «Ягона буюртмачи хизмати» инжиниринг компанияси давлат бюджети маблағлари ҳисобидан молиялаштириладиган ушбу лойиҳанинг буюртмачиси ҳисобланади. Объект қурилишига 2020 йил охирига қадар 32,6 миллиард сўм, 2021 йилда 67,6 миллиард сўмлик маблағ ажратиш режалаштирилган. 23 октябрь ҳолатига кўра 9,7 миллиард сўм миқдоридаги аванс тўлови молиялаштирилган, шунингдек, материалларни сотиб олиш учун яна 10 миллиард 0 сўм миқдорида аванс ўтказиш режалаштирилган.
Лойиҳа пудратчиси Power Construction Planet МЧЖ бўлиб, компания билан шартнома 7 октябрда имзоланган. Вазирлар Маҳкамасининг 9 сентябрдаги 401-ф-сонли фармойиши билан лойиҳани танловсиз амалга оширишга рухсат берилди. Нашрнинг ёзишича, ҳукумат фармойишларини 28 майдан бошлаб Қонунчилик маълумотлари миллий базасида нашр этиш тўхтатилган
Корхоналар ва ташкилотларнинг ягона давлат реестри маълумотларига кўра, Power Construction Planet МЧЖ 2008 йил 12 сентябрда рўйхатдан ўтган. Компаниянинг 66,9 фоиз улушига Исмоил Исроилов, 33,1 фоизига Абдурасул Зоҳидов эгалик қилади.
Исмоил Исроилов илгари Akfa Engineering and Managemen компаниясининг директори ва директор ўринбосари бўлиб ишлаган ва бир қатор компанияларнинг улушларига эга бўлган. Абдурасул Зоҳидов 2020 йил январь ойи бошида Discover Invest МЧЖ директори сифатида «Дўстлик» ордени билан тақдирланган. Discover Invest МЧЖ Tashkent City ва Ашхобод паркларини, Hilton меҳмонхонаси, конгресс-марказ, Imzo ва Artel, Akfa Medline ва бошқа корхоналар биноларини қурган.
Лойиҳани ишлаб чиқувчи вазифаси Prime Tower Group МЧЖ га топширилган. Унинг таъсисчилари эса Жасур Баҳодирович Бадалов (35 фоиз), Сардор Хабаржонович Умматов (30 фоиз) ва Артур Дамирович Нуриев (35 фоиз) ҳисобланишади.
Шу билан бирга, Power Construction Planet Тошкент вилоятининг Зангиота туманида 2160 ўринли ихтисослаштирилган карантин зонасини қуриш билан ҳам шуғулланган. Объектнинг қиймати 39,2 миллиард сўмга баҳоланган. Шунингдек, лойиҳани Вазирлар Маҳкамасининг 23 июлдаги 337-ф-сонли фармойиши асосида танловсиз амалга оширишга рухсат берилган.
Тошкентда ситуатион марказ яратиш режаси ҳақида 2018 йилнинг апрель ойида маълум бўлган. Ўшанда Жанубий кореялик мутахассис, Сеул шаҳри мэрияси вакили Ким Ю Шик шаҳар ҳокимининг пойтахт маъмурияти иши тизимига ахборот-коммуникация технологияларини жорий қилиш бўйича маслаҳатчиси этиб тайинланганди.
«Маслаҳатчининг асосий вазифалари — Тошкентда ҳам Сеулдагидек шаҳар бошқаруви бўйича ситуацион марказ яратилишидан иборат. Ягона марказ орқали шаҳарда коммунал соҳа, шаҳарсозлик, ёнғин хавфсизлиги, тезкор чоралар кўриш тизимларидаги барча вазиятларни онлайн режимда кузатиш мумкин. Унга кўчалардаги барча кузатув камералари ҳам уланади. Буни Сmart City унсурларидан бири дея ҳисоблаш ҳам мумкин, аммо бу мутлақо алоҳида лойиҳа», — дея таъкидлаганди шаҳар ҳокимининг ўша вақтдаги ўринбосари Алишер Тиллаев.
Изоҳ (0)