Тошкент шаҳар ИИББ ходимлари туман ҳудудида фарзандлари билан бирга юриб тиланчилик қилаётган бир нечта аёл билан профилактик суҳбатлар ўтказди, дея хабар берди Тошкент шаҳар ИИББ.
Юнусобод тумани ИИО ФМБ хотин-қизлар масалалари бўйича катта инспектор тегишли ҳудудни кўздан кечириш давомида Шаҳристон чорраҳасида тиланчилик қилаётган икки нафар аёл ва уларнинг фарзандлари билан суҳбатлашди. Суҳбат давомида аёллар ўз ҳолатларини тушунтиришди. Тошкент вилояти, Юқори Чирчиқ туманида яшовчи, 28 ёшли Д.Н. қариндоши 19 ёшли Ф.М. билан бирга Тошкентга ишга жойлашиш учун келгани ойдинлашган. Икковлон ярим йил давомида Ободонлаштириш бошқармасида ишлаган, аммо маблағ етишмагани сабабли тиланчилик қилишга қарор қилган.
Қайд этилишича, аёлларга уйга қайтишида амалий ёрдам кўрсатилган ва улар билан профилактик суҳбат ўтказилган.
Шунингдек, Тошкент шаҳар ИИББ ходимлари мазкур фуқаролар яшайдиган ҳудуддаги хотин-қизлар масалалари бўйича инспектор билан боғланиб, уларни ишга жойлаштиришда ёрдам сўраган.
Юнусободда вояга етмаган фарзандлари билан юрган бошқа аёллар — қашқадарёлик 27 ёшли Ф.О. беш нафар фарзанди билан, 20 ёшли У.С. ва 22 ёшли Р.T. билан ҳам суҳбат ўтказилган. Аёлларнинг сўзларига кўра, улар турмуш ўртоқлари ва болалари билан битта хонадонда ижарада туради. Оила бошлиқлари ишлаб чиқариш корхоналарида ишлаши, аммо топаётган даромади етмаётганлиги боис тиланчилик қилишга қарор қилган.
«Тошкент шаҳар ИИББ ходимлари улар билан тиланчилик учун жавобгарлик кўзда тутилгани ҳақида огоҳлантириш суҳбати ўтказди», – дейилади бошқарма хабарида.
Шу билан бирга, Юнусобод туманида тиланчилик қилаётган Қашқадарё вилояти Чироқчи туманида яшовчи 22 ёшли М.М. икки нафар вояга етмаган фарзандлари билан биргаликда, Сурхондарё вилоятилик 27 ёшли Г.С. тўрт нафар фарзанди билан, 26 ёшли И.Х. билан ҳам профилактик суҳбат қилинган. Уларга қонунчиликда мазкур фаолият учун жавобгарлик кўзда тутилгани ҳақида тушунчалар берилган.
Изоҳ (0)