Оила, уй ва машиналар. Муҳаммад Салоҳ қандай ҳаёт кечиради?

«Ливерпуль» ва Миср терма жамоаси етакчиси Муҳаммад Салоҳ мана уч йилдирки (2017 йилда «Ливерпуль»га ўтганидан бери), юқори даражада ўйин кўрсатмоқда. Унинг мухлислари сафи эса тобора кенгайиб бормоқда. Табиийки, уларни Салоҳнинг майдондаги ҳаракатларидан ташқари, унинг шахсий ҳаёти, машиналари, уйлари ва умуман қандай ҳаёт кечириши қизиқтиради. Гарчи Муҳаммад шахсий ҳаётини оммага намойиш этишни унчалик хушламаса ҳам, қуйида айнан мазкур саволларга имкон қадар жавоб беришга ҳаракат қиламиз.

Салоҳ қаерда яшайди?

Футболчи Ливерпуль атрофидаги шахсий уйида яшайди. Ушбу уй унга клуб томонидан тақдим этилган. У атиги 2 қават бўлиб, ихчам ва кўп жойни эгалламайди. Ҳудудда катта спорт зали ва улкан сузиш ҳавзалари йўқ. Бироқ унда футболчига машғулот ўтказиш ва яшаш учун керакли бўлган барча жиҳозлар муҳайё.

Футболчининг яна бир уйи Миср пойтахти Қоҳирада жойлашган. 2 йил олдин тармоқда Салоҳнинг манзили пайдо бўлади, шундан сўнг уй атрофида кўплаб одамлар тўплана бошлайди. Ҳар сафар футболчини кўриш ва у билан суратга тушиш учун келадиганлар сони кўпайиб бораверди. Шу тариқа полиция Салоҳнинг уйини тўсиб қўйишга мажбур бўлди. Шундан кейингина уй атрофида одамлар сони камайишни бошлади.

Салоҳ қандай машиналарда юради?

Ferrari California – 250 минг доллар

Машинанинг максимал тезлиги 316 км/соатни ташкил қилади, у тезлигини атиги 4 сонияда 100 км/соатгача кўтариши мумкин. Мазкур автомобиль 2014 йилда Женевада намойиш этилган.

Bentley Cоntinental GT– 335 минг доллар

Хусусиятлари жиҳатидан ушбу машина олдингисидан устунроқ туради. Унинг максимал тезлиги 333 км/соатга тенг бўлиб, 3,7 сонияда унинг спидометридаги кўрсаткичи 100 чизиғига етади. Айтишларича, ушбу модель бор-йўғи 4 кишига мўлжалланган экан.

Салоҳнинг оиласи қандай?

Муҳаммад Салоҳ 2013 йилда, 21 ёшида Мажи исмли қизга уйланиб, оила қуради. Тўй маросими футболчининг она қишлоғи Нагри бўлиб ўтган. 2014 йилда футболчининг оиласида қиз фарзанд дунёга келади. Муҳаммад унга Макка деб исм қўяди. Футболчининг айтишича, у 4 нафар фарзанд кўришни орзу қилади.

Салоҳнинг дўстлари ким?

Муҳаммад Салоҳ – жуда хушчақчақ инсон. Бироқ у «Ливерпуль»да фақат икки ўйинчи билан дўстлашган. Афсуски, уларнинг ҳар иккаласи ҳам ҳозир бошқа жамоаларда ҳаракат қилади.

Филиппе Коутиньо

Коутиньо билан Салоҳ клубга қўшилгандан сўнг дўстлашган. Улар машғулотлар пайтида ва кийиниш хонасида кўп вақтни бирга ўтказишган, табиийки, майдонда ҳам Салоҳ айнан бразилияликнинг узатмаларидан кейин тез-тез гол уриб турарди. Аммо 2018 йилда Филиппе «Барселона»га йўл олди. Ҳозирда футболчилар бир-бирларини жуда кам кўради.

Деян Ловрен

Футболчилар жамоа йиғинида дўстлашиб қолган. Дўстлар жуда кўп умумий жиҳатларга эга. Мисол учун, уларнинг ҳар иккаласи ҳам қийин болаликка эга. Ловрен «Зенит»га ўтганига қадар, улар жуда кўп вақтни бирга ўтказган.

• Салоҳ компьютер ўйинларини яхши кўради. У соатлаб ФИФА ўйнаши мумкин.
• Футболчи тез-тез ресторанларга ташриф буюриб туради. Унинг севимли таоми эса пицса.
• Мисрлик фотосессияларда қатнашишни яхши кўради ва уларни  толмай Instagram’даги саҳифасига жойлаб боради. Албатта, у бунинг учун яхшигина пул олади.

Салоҳнинг яна бир таҳсинга сазовор хусусияти – бу унинг хайрия ишлари билан шуғулланишидир. У доимий равишда туғилган шаҳри аҳолисига ёрдам бериб келади. 2018 йилда у шаҳар аҳолисини сув билан таъминлаганди. Бу унга 450 минг долларга тушган, шунингдек, у ўша шаҳарда мактаб, касалхона ва спорт майдончаларини қурилишига ҳам пул ўтказган. Бундан ташқари, футболчи тўй қилишга қурби етмайдиганларга ҳам кўмак бериб келади. У ҳатто отасининг уйини ўмарган ўғри билан учрашиб, унга пул бериб, иш топишда ҳам ёрдам берган. Шунингдек, Салоҳ отасидан даъво аризасини қайтариб олишни сўраган.

Шунчаки браво, Муҳаммад Салоҳ!