Estoniya ichki ishlar vaziri AQShdagi prezidentlik saylovini tanqid qilgani uchun iste’foga chiqdi

Estoniya ichki ishlar vaziri Mart Xelme AQShda bo‘lib o‘tgan prezidentlik saylovi haqida fikr bildirdi va bu fikrlar ortidan unga nisbatan yopirilgan tanqidlar sababli iste’foga chiqdi. Bu haqda “RBK” xabar berdi.

“Men Estoniya mudofaa qobiliyatiga putur yetkazadigan hech narsa qilmadim. Men Amerika OAVlari gapirmayotgan narsani gapirmadim. Erkin Amerika OAVlari”, — deya ta’kidlagan Xelme. Uning qo‘shimcha qilishicha, g‘alaba uchun o‘ziga yetarli ovozlarni ta’minlagan Jo Bayden hali AQSh prezidenti hisoblanmaydi, uning vakolatlari esa barcha sud jarayonlari yakunlanganidan keyin tasdiqlanadi.

Avvalroq Mart Xelme va Estoniya moliya vaziri Martin Xelme TRE radiostansiyasidagi chiqishi vaqtida AQShdagi saylovlarning halolligiga shubha qilishini bildirgan. “Menimcha, saylov soxtalashtirilganiga hech qanday shubha yo‘q”, — degan Martin Xelme. O‘z navbatida, Mart Xelmening qo‘shimcha qilishicha, Baydenning g‘alabasi ortida “chuqurlikdagi davlat” turibdi. Estoniya bosh vaziri Yuri Ratas esa vazirlarning so‘zlarini tanqid qilgan hamda AQShdagi saylovni “soxta xabarlarga” asoslanib, tanqid qilish vazirlar uchun o‘rinli emasligini ta’kidlagan.

Jo Bayden jamoaviy saylovchilarning 270 dan ortiq ovozini to‘plagani haqida 7-noyabr kuni ma’lum bo‘ldi. Bu haqda AQShning yetakchi OAVlari, jumladan CNN, The New York Times va Associated Press xabar berdi. Biroq AQShning amaldagi prezidenti Donald Tramp saylov yakunlanishiga “hali ko‘p vaqt borligini” ma’lum qilgan. Uning so‘zlariga ko‘ra, bo‘lib o‘tgan saylovda pochta orqali ovoz berish bilan bog‘liq ko‘p sonli qonun buzilishlari yuz bergan. Donald Tramp 9-noyabrdan bu masala bo‘yicha sud jarayonini boshlashni va’da qilgan.

Ekspertlarning fikricha, sud jarayonlari alohida shtatlardagi ovozlarni qayta hisoblab chiqish saylovning rasmiy natijalarini e’lon qilishni uzoq muddatga qoldirishi mumkin. Biroq 20-yanvargacha saylov komissiyasi ovoz berish yakunlarini e’lon qilmasa, Tramp o‘z vakolatlarini prezident vazifasini bajaruvchiga topshirishi kerak bo‘ladi. Bu vitse-prezident yoki AQSh vakillar palatasi spikeri bo‘lishi mumkin.