UzReport telekanalining ijodiy jamoasi yana bir bor poytaxtning Yunusobod tumanida joylashgan Ahmad Donish ko‘chasidan reportaj tayyorladi.
Avvalroq Mega Planet savdo markazi atrofidagi yo‘llarning bir qismi shoshma-shosharlik bilan amalga oshirilgani namoyish etilgan bo‘lsa, bu safar telekanal jamoasi bir yil oldin tashrif buyurgan joyiga qayta borgan.
Ta’kidlanishicha, o‘tgan bir yil ichida yo‘lning ushbu qismi deyarli o‘zgarishsiz qolgan — avvalgidek “Amerika tepaligi” attraksioniga o‘xshash o‘nqir-cho‘nqir yo‘llar, chuqurliklar va o‘ralar. Bir yil oldingi yo‘l bilan uning bugungi holatini taqqoslash uchun tayyorlangan kadrlardan ko‘rish mumkinki, avtomobil yo‘lining bu qismi ta’mirlanmagan.
Jurnalistlarning haydovchilar o‘rtasida o‘tkazgan so‘rovlariga ularning har ikkitadan bittasi ushbu yo‘llardan qoniqmasligini aytgan.
“To‘g‘risini aytsam, yo‘q. Meni qoniqtirmaydi bu yo‘llar, hamma joyda tartibsizlik va tirbandliklar”, — deydi haydovchilardan biri.
Yana bir haydovchi esa yo‘lning ushbu qismi qurilganidan buyon ta’mirlanmaganidan noligan.
Telekanal jurnalistlari tomonidan yanvar oyida tayyorlangan reportajda ushbu ko‘priklarni ta’mirlashga javobgar “Ko‘prikqurilishtrest” unitar korxonasi vakili Anorboy Annaqulov holat bo‘yicha tushuntirish bergandi:
“Avgust oyida joriy ta’mirlash ishlarini boshlaganmiz, sentabr oxirida temir-beton konstruksiyalarning ta’mirlash ishlari yakunlangan. Yo‘l o‘tkazgich 2000-yil qurilgan bo‘lsa, o‘shandan buyon ta’mirlash ishlari amalga oshirilmagan. Shu sababli temir-beton choklar yemirilgan va deformatsiyaga uchragan”.
Qayd etilishicha, qish fasli, havo sovuq bo‘lgani uchun asfalt-beton qoplamalarni yotqizish ishlari o‘sha vaqtda to‘xtab qolgan. Anorboy Annaqulov yanvar oyida intervyusida ko‘prikni to‘liq ta’mirlash ishlari 1-2 oy ichida yakunlanishini bildirgan edi.
“O‘tgan 10 oy ichida ko‘prik o‘z-o‘zidan ta’mirlanib qolmagan, faqatgina hokim qaroriga o‘zgartirish kiritilgan. Fevraldan boshlab Ahmad Donish ko‘chasi va Farg‘ona yo‘li trassasini rekonstruksiya qilish mas’uliyati hokimiyat zimmasiga yuklatilgan. Biroq hokimlikdan hech kim holat bo‘yicha tushuntirish berishni istamagan”, — deyiladi xabarda.
Lavhani tayyorlash vaqtida jurnalistlar Labo va Nexia-3 ishtirokida sodir bo‘lgan YTHning guvohiga aylangan. Ma’lum bo‘lishicha, yo‘llar notekisligi sabab “Gazel”ning yukxonasidan temir bo‘lagi tushib qolgan va orqada kelayotgan mashinalar keskin to‘xtashni amalga oshirib, YTH sodir etgan.
“Doim shu yo‘ldan yuraman va har safar avariyalarga duch kelaman”, — deydi haydovchilardan biri. Taksichilardan birining aytishicha, u kun davomida shu yo‘lning o‘zida uchta YTHga duch kelgan.
Eslatib o‘tamiz, iyun oyida Toshkent metrosining “Yunusobod” yo‘lidagi 2 ta yangi bekat qurib bitkazilgan edi. Metroning yangi yo‘nalishlari Ahmad Donish ko‘chasidan o‘tgan. Ko‘chani ta’mirlash ishlari metro yo‘nalishlari yakunlanganidan so‘ng boshlangan. Ahmad Donish ko‘chasining Amir Temur ko‘chasidan Toshkent halqa avtomobil yo‘ligacha bo‘lgan 2,2 kilometr qismi 6 qatorli qilib qayta qurilgan.
Izoh (0)