“Nega aynan muqaddam sudlanganlar ishlayapti?”. Nig‘matilla Yo‘ldoshev poytaxt bozorlari bosh nazoratchisini so‘roq qildi

Bosh prokuraturada 7-noyabr kuni tashkil etilgan korrupsiya masalalariga oid idoralararo yig‘ilishda bosh prokuror Nig‘matilla Yo‘ldoshev “Yangiobod ixtisoslashgan bozori” direktori qator korrupsiyaviy jinoyatlarni sodir etishda ayblanganini ma’lum qilgandi. Bosh prokuror ayni paytda bozorlarda tanish-bilishchilik, turli suiiste’molchilik va talon-torojliklar avj olayotganini bildirib, “Ta’bir joiz bo‘lsa, bu fayzli maskanlar korrupsiya o‘chog‘iga aylanib bormoqda”,— degan.

Shuningdek, u holatni izohlar ekan, “Nahotki bu holatdan Toshkent shahar hokimligi va Munitsipial aktivlarni boshqarish markazi rahbari Muzaffar Abdurahmonovning xabari bo‘lmasa, yoki qayta qayta sudlangan, borgan joyidan o‘ziga pul o‘marishni kasb qilgan bu shaxsni yana rahbarlikka tayinlashdan u manfaatdormi? Ismoilov qamoqqa olingandan so‘ng uning o‘rniga hamtovog‘i Yo‘lbarsov tayinlanganligiga nima deysiz?”, — deb qo‘shimcha qilgan.

“Daryo” muxbiri Mirolim Isajonovning xabar berishicha, mazkur tadbirning savol-javob qismida O‘zbekiston bosh prokurori Toshkent shahar hokimligi huzuridagi kommunal aktivlarni boshqarish markazi bosh direktori Muzaffar Abdurahmonovni onlayn tarzda so‘roq qilgan.

Muzaffar Abdurahmonov: Barcha e’tirozlaringiz o‘rinli. Hammasidan xulosa qildim. Kadrlar masalasini ham qayta ko‘rib chiqaman.

Nig‘matilla Yo‘ldoshev: Qachondan beri ishlaysiz bu lavozimda?

Muzaffar Abdurahmonov: Faoliyatim 2019-yil iyul oyidan boshlangan.

Nig‘matilla Yo‘ldoshev: Bu holatlarga nima deysiz, qanday izoh berasiz?

Muzaffar Abdurahmonov: Bu sohaga yangi kirganim uchun uni to‘liq ichigacha o‘rganmagan ekanman. Bozor sohasiga kelganimda bozor tushumi oyiga o‘rtacha 8-10 milliard so‘m daromad keltirardi. Biz har bir bozordagi ijara haqi, avtoturargoh va boshqa masalalarni nazoratga olib, oylik tushumlarni 22 milliard so‘mgacha, ya’ni 220 foizga ko‘tardik. Masalan, Eski shahar dehqon bozoridagi avtoturargohni ko‘zdan kechirganimizda...

Nig‘matilla Yo‘ldoshev: O‘zi umumiy nechta bozoringiz bor?

Muzaffar Abdurahmonov: 20 ta bozor savdo korpuslari mavjud, shundan 12 tasi dehqon bozori, 8 ta ixtisoslashtirilgan bozor.

Nig‘matilla Yo‘ldoshev: Shu bozorlarning egasi o‘zi kim, u yerlarda qarindosh-urug‘, tanish-bilishchilik yo‘qmi, deb sekin “geografiya”dan boshlab o‘rganmaysizmi? Keyin nega aynan bozordagi faoliyatida suiiste’mol va talon-taroj qilish holati bo‘yicha muqaddam sudlanganlar ishlayapti? Shularga bir ahamiyat qaratilmadimi? Nima uchun jinoyat ishi qo‘zg‘atilganidan so‘ng uning (poytaxtdagi “Yangiobod ixtisoslashgan bozori” direktori Ismoilov – tahr.) o‘rniga yana shuni hamtovog‘i Yo‘lbarsov boshliq qilib tayinlandi?

Muzaffar Abdurahmonov: Uning hamtovog‘i ekanligini bilmayman, muhtaram Bosh prokuror. Lekin Bosh prokuratura departamenti tomonidan “Tez bitta xodim beringlar, imzo qo‘yish vakolatiga ega bo‘lsin”, deyishgani sababli uning o‘rinbosarini vaqtinchalik vazifa bajaruvchi qilib qo‘yganmiz.

Nig‘matilla Yo‘ldoshev: O‘zi xohlagan odamingizni hujjatini ko‘tarsangiz, unga tegishli bo‘lib chiqardi, to‘g‘rimi?

Muzaffar Abdurahmonov: Men uzr so‘rayman...

Nig‘matilla Yo‘ldoshev: Bozor direktorlarini sizning taqdimnomangiz bilan shahar hokimi imzo qo‘yib, tasdiqlaydimi? Lavozimga tayinlash qanday bo‘ladi? Bizning tergov hali buni oxiriga yetadi. Kim tavsiya etadi lavozimga qo‘yishga?

Muzaffar Abdurahmonov: Har bir bozor rahbarining kadrlar masalasini shahar hokimi orqali o‘tkazamiz.

Nig‘matilla Yo‘ldoshev: Buyruqni siz chiqarasizmi?

Muzaffar Abdurahmonov: Buyruqni men chiqaraman. Ammo bizda kengash bor, o‘sha kengash raisi imzo qo‘yadi.

Nig‘matilla Yo‘ldoshev: Mayli endi qarang, bir o‘zi boshqa bozorda, ikkinchi o‘g‘li ikkinchi bozorda, uchinchi o‘g‘li to‘rtinchi bozorda, yana bir jiyani xavfsizlik bo‘yicha bo‘ladigan bo‘lsa... Bu tom ma’nodagi haqiqiy bozor bo‘lib qolibdi-da unda?!

Muzaffar Abdurahmonov: Men bu haqda yaqinda jinoiy ish ochilganida bildim. “Farhod” dehqon bozori o‘rinbosarini bilmasdim. “Aviasozlar” dehqon bozoridagi rahbar ham unga tegishli odam ekanligini hozir bildim. Men uzr so‘rayman.

Nig‘matilla Yo‘ldoshev: Toshkent shahar hokimining o‘rinbosari bormi, qayerda? Davron aka siz qanday tushuntirish berasiz?

Toshkent shahar hokimining birinchi o‘rinbosari Davron Hidoyatov: Men bu masala bo‘yicha javobgar emasman. Lekin endi biz har bir bozor rahbari uchun tekshiruv o‘tkazamiz: u sudlanganmi yoki yo‘qmi? Shu paytgacha bu ish bilan shug‘ullanganlarni xatlovdan o‘tkazib, biz albatta o‘rganamiz.

Nig‘matilla Yo‘ldoshev: Muhtaram prezidentimizning bozorlarga bo‘lgan munosabatini siz bilan biz juda yaxshi bilamiz, to‘g‘rimi?

Davron Hidoyatov: To‘g‘ri, to‘g‘ri.

Nig‘matilla Yo‘ldoshev: Shunday bir sharoitda qilayotgan ishimiz nahot shunday talablarga javob beradi, deb o‘ylaymiz?! Undan ko‘ra aholiga qulaylik yaratish maqsadida bozor daromadini oshirib, o‘zimizning qadriyatlarga mos va xos bozorlarni yaratsak bo‘lmaydimi?

Davron Hidoyatov: To‘ppa-to‘g‘ri aytyapsiz. Kamchiliklar juda ko‘p. Hozirgacha ancha ish qilingan. Lekin bu yetarli emas. Haqiqatan qaysi bozor rahbarining hujjatini ko‘tarsak, hammasi muqaddam sudlangan bo‘lib chiqadi...

Nig‘matilla Yo‘ldoshev: Hammasidan o‘zimizdan, insofni birinchi o‘zingga so‘ra deydiku. O‘zimiz shunga yo‘l qo‘yib beramiz. Shuning uchun Davron aka tegishli xulosa chiqarib... Bu kishi (Muzaffar Abdurahmonov nazarda tutilyapti – tahr.) shahar hokimi oldidan o‘tadi deyapti. Demak shahar hokimiyati ichida ham bevosita bozorlarga rahbar tanlash, tayinlash, joyiga qo‘yish masalasi bilan shug‘ullanadigan xodim bo‘lsa kerak. Shuni ham mas’uliyatini ko‘rib chiqish kerak, jazo belgilashni ham ko‘rish lozim. Faqat jinoiy javobgarlik emas, ma’muriy, intizomiy javobgarligi ham bor, to‘g‘rimi?

Davron Hidoyatov: To‘ppa-to‘g‘ri, biz bu masalani ham ko‘taramiz. Bu bo‘yicha sizga alohida...

Nig‘matilla Yo‘ldoshev: Hokimingizga yetkazing.