Tokio universitetining bir guruh olimlari ko‘rshapalaklar tezagida genomi yangi SARS-CoV-2 koronavirusiga juda o‘xshash virus topdi. Bu haqda Yaponiya jamoatchilik televideniyesiga tayanib, “RBK” xabar bermoqda.
Tadqiqot olib borgan universitet xodimi, veterinariya meditsinasi kafedrasi dotsenti Sin Murakamining so‘zlariga ko‘ra, ko‘rshapalaklarning biomateriali yetti yil avval Yaponiyada olingan. Ular aniqlagan virus genomi bilan koronavirus infeksiyasi keltirib chiqaradigan SARS-CoV-2 genomining o‘xshashligi 81,5 foizga to‘g‘ri kelgan.
Shu bilan birga, olimlar tadqiqot o‘tkazib, topilgan virus ko‘rshapalaklardan odamlarga yuqmasligini aniqlagan. Murakami Xitoyda genomi SARS-CoV-2’ga 95 foiz o‘xshash bo‘lgan virus topilganini ham aytib o‘tgan.
Xabarda qayd etilishicha, oktabr oyida “Rospotrebnadzor” Markaziy ilmiy-tadqiqot epidemiologiya instituti genomika va post-genomik tadqiqot guruhining rahbari Anna Speranskaya Rossiyada ko‘rshapalaklarda koronaviruslar kuzatilganligi, ularning turlari aniqlanishi kerakligini aytgan.
“Rospotrebnadzor” avgust oyidayoq ushbu hayvonlarni koronavirusga tekshirmoqchi ekanligini bildirgan. Shunday qilib, olimlar qaysi viruslar ko‘rshapalaklar orasida tarqalishini, ularning ilgari ma’lum bo‘lgan kasalliklar bilan qanday bog‘liqligi borligini aniqlash niyatida.
Izoh (0)