Amerikalik tadqiqotchilar koronavirus belgisiz o‘tayotgan bemorlarning yo‘tali sog‘lom insonlar yo‘talidan tovushi bo‘yicha farq qilishini aniqladi. Inson quloqlari uni farqlay olmaydi, ammo bu sun’iy intellektning qo‘lidan keladi, deb yozadi Esquire.
Massachusets texnologiyalar institutidan bo‘lgan bir guruh olimlar bemorning yo‘talishiga qarab koronavirus tashxisini qo‘yadigan dasturni yaratdi. Olimlarning fikricha, sun’iy intellekt, ayniqsa, kasallik belgisiz o‘tayotgan bemorlarni aniqlashga qo‘l keladi.
Algoritm COVID-19 bilan kasallangan va sog‘lom odamlarni 98,5 foiz aniqlikda ajrata oladi. Tizim o‘n minglab yo‘tal namunalari asosida yaratilgan.
Hozirda olimlar guruhi dasturdan mobil ilova orqali foydalanish imkoniyatni yaratish ustida ish olib bormoqda. Agarda AQSh Sog‘liqni saqlash va ijtimoiy xizmatlar vazirligi mazkur ixtirodan keng ko‘lamda foydalanishga ruxsat bersa, mobil ilova kasallikni aniqlashda qulay va bepul ilovaga aylanishi mumkin.
Dastur mualliflari o‘zlarining ixtirosi koronavirusni aniqlashda yagona vosita bo‘lmasligini ta’kidlab o‘tgan. Agar sun’iy intellekt infeksiyani aniqlasa, shundan so‘ng COVID-19’ga an’anaviy test topshirish kerak bo‘ladi.
Avvalroq Eronda koronavirusni yarim daqiqada aniqlovchi nanotest, amerikalik olimlar koronavirusni tezda aniqlovchi qurilma yaratilgani to‘g‘risida xabar berilgandi.
Izoh (0)