Токио университетининг бир гуруҳ олимлари кўршапалаклар тезагида геноми янги SARS-CoV-2 коронавирусига жуда ўхшаш вирус топди. Бу ҳақда Япония жамоатчилик телевидениесига таяниб, «РБК» хабар бермоқда.
Тадқиқот олиб борган университет ходими, ветеринария медицинаси кафедраси доценти Син Муракамининг сўзларига кўра, кўршапалакларнинг биоматериали етти йил аввал Японияда олинган. Улар аниқлаган вирус геноми билан коронавирус инфекцияси келтириб чиқарадиган SARS-CoV-2 геномининг ўхшашлиги 81,5 фоизга тўғри келган.
Шу билан бирга, олимлар тадқиқот ўтказиб, топилган вирус кўршапалаклардан одамларга юқмаслигини аниқлаган. Мураками Хитойда геноми SARS-CoV-2’га 95 фоиз ўхшаш бўлган вирус топилганини ҳам айтиб ўтган.
Хабарда қайд этилишича, октябрь ойида «Роспотребнадзор» Марказий илмий-тадқиқот эпидемиология институти геномика ва пост-геномик тадқиқот гуруҳининг раҳбари Анна Сперанская Россияда кўршапалакларда коронавируслар кузатилганлиги, уларнинг турлари аниқланиши кераклигини айтган.
«Роспотребнадзор» август ойидаёқ ушбу ҳайвонларни коронавирусга текширмоқчи эканлигини билдирган. Шундай қилиб, олимлар қайси вируслар кўршапалаклар орасида тарқалишини, уларнинг илгари маълум бўлган касалликлар билан қандай боғлиқлиги борлигини аниқлаш ниятида.
Изоҳ (0)