Toshkent shahrining ko‘p qavatli uylarning birida ikki yigit telefon uchun janjallashib qolishi natijasida ulardan biri ikkinchisiga pichoq bilan 13 marta zarba bergan. Bu haqda “Sevimli” telekanalining “Zamon.uz” dasturida xabar qilindi.
Qayd etilishicha, 26 yoshli yigit 23 yoshli Umarxon Anvarovdan qarzga olgan telefonini qaytarishni so‘ragan. Natijada ikki do‘st janjallashib ketgan. Oqibatda 23 yoshli yigit o‘zidan 3 yosh katta tanishiga 13 marta pichoq urgan. Koma holatiga tushgan jabrlanuvchi baxtli tasodif tufayli tirik qolgan.
“O‘g‘limni operatsiya qilish kerak. Hozir qo‘li ishlamaydi. Bus-butun bolam nogiron bo‘lib qoldi. Ichaklari va umurtqasiga pichoq teggan”, – deydi jabrlanuvchining onasi.
Ayblanuvchi yuz bergan hodisa haqida quyidagicha bayon qildi.
“Aziz akam bilan kechasi urishib ketdik. Shundan so‘ng qo‘rqitish maqsadida pichoq tiqib oldim”, – deydi Umarxon.
Ayblanuvchi voqea yuz bergan vaqtda shok holatida bo‘lganini aytib suddan yengilroq jazo so‘ragan. Shuningdek, Yoshlar ittifoqi huzuridagi Yosh huquqshunoslar kengashi va sudlanuvchi yashaydigan mahalla raisi ham suddan ayblanuvchini hibsga olmaslikni so‘radi.
Sud ayblanuvchiga nisbatan Jinoyat kodeksining 104-moddasi 1-qismi (qasddan badanga og‘ir shikast yetkazish) bilan 5 yil muddatga ozodlikdan mahrum qilish jazosi tayinlagan.
Avvalroq Qashqadaryoda qarzini undirmoqchi bo‘lgan yigit qarzdorni pichoqlab qo‘ygani, shishadoshini pichoqlagan andijonlik ayol 5 yilga qamalgani hamda Sirdaryoda birgalikda spirtli ichimlik ichgan norasmiy er-xotin o‘rtasidagi janjal ayolning o‘limi bilan tugagani haqida xabar berilgandi.
Izoh (0)