Тошкент шаҳрининг кўп қаватли уйларнинг бирида икки йигит телефон учун жанжаллашиб қолиши натижасида улардан бири иккинчисига пичоқ билан 13 марта зарба берган. Бу ҳақда «Севимли» телеканалининг «Zamon.uz» дастурида хабар қилинди.
Қайд этилишича, 26 ёшли йигит 23 ёшли Умархон Анваровдан қарзга олган телефонини қайтаришни сўраган. Натижада икки дўст жанжаллашиб кетган. Оқибатда 23 ёшли йигит ўзидан 3 ёш катта танишига 13 марта пичоқ урган. Кома ҳолатига тушган жабрланувчи бахтли тасодиф туфайли тирик қолган.
«Ўғлимни операция қилиш керак. Ҳозир қўли ишламайди. Бус-бутун болам ногирон бўлиб қолди. Ичаклари ва умуртқасига пичоқ теккан», – дейди жабрланувчининг онаси.
Айбланувчи юз берган ҳодиса ҳақида қуйидагича баён қилди.
«Азиз акам билан кечаси уришиб кетдик. Шундан сўнг қўрқитиш мақсадида пичоқ тиқиб олдим», – дейди Умархон.
Айбланувчи воқеа юз берган вақтда шок ҳолатида бўлганини айтиб суддан енгилроқ жазо сўраган. Шунингдек, Ёшлар иттифоқи ҳузуридаги Ёш ҳуқуқшунослар кенгаши ва судланувчи яшайдиган маҳалла раиси ҳам суддан айбланувчини ҳибсга олмасликни сўради.
Суд айбланувчига нисбатан Жиноят кодексининг 104-моддаси 1-қисми (қасддан баданга оғир шикаст етказиш) билан 5 йил муддатга озодликдан маҳрум қилиш жазоси тайинлаган.
Аввалроқ Қашқадарёда қарзини ундирмоқчи бўлган йигит қарздорни пичоқлаб қўйгани, шишадошини пичоқлаган андижонлик аёл 5 йилга қамалгани ҳамда Сирдарёда биргаликда спиртли ичимлик ичган норасмий эр-хотин ўртасидаги жанжал аёлнинг ўлими билан тугагани ҳақида хабар берилганди.
Изоҳ (0)