Parij politsiyasi prefekti Dide Lallement karantin choralarini kuchaytirish haqida farmon imzoladi. Unga ko‘ra tunda shaharda oziq-ovqat yetkazib berish, shuningdek, olib ketiladigan oziq-ovqat va alkogolli ichimliklar sotib olish taqiqlanadi. Bu haqda BFM TV’ga tayanib “RBK” xabar bermoqda.
Aholi ushbu xizmatlardan soat 22:00 dan 6:00 gacha foydalana olmaydi. Taqiq 6-noyabrdan kuchga kiradi. U qancha muddat davom etishiga aniqlik kiritilmagan.
“Aslida, bu soat 22:00 dan 6:00 gacha ushbu muassasalarning yopilishini anglatadi”, – deyiladi xabarda.
Bundan tashqari, farmoniga ko‘ra alkogolli ichimliklarni tunda sotish va odamlar ko‘p bo‘lgan joylarda iste’mol qilish taqiqlanadi.
Parij meri Ann Idalgo ushbu cheklovlarni izohlar ekan, so‘nggi paytlarda politsiya tunda restoran hamda barlarga tashrif buyuruvchilar faoliyatini kuzatayotganini ma’lum qildi.
Uning so‘zlariga ko‘ra, ovqatlanish shoxobchalari mijozlari masofani saqlamagan va Sog‘liqni saqlash vazirligi tomonidan belgilangan tavsiyalarni buzgan.
So‘nggi 24 soat ichida Fransiyada koronavirus bilan kasallangan 40 558 kishi aniqlandi. Ulardan 211 kishi intensiv terapiyaga yuborildi. Ayni paytda COVID-19 bilan kasallangan 4089 kishi Fransiya kasalxonalarida jonlantirish bo‘limlarida yotibdi. Fransiyada hozirgacha 1,5 milliondan ortiq kasallik aniqlandi. Bemorlarning 38 674 kishi vafot etdi.
Izoh (0)