Париж полицияси префекти Дидье Лаллемент карантин чораларини кучайтириш ҳақида фармон имзолади. Унга кўра тунда шаҳарда озиқ-овқат етказиб бериш, шунингдек, олиб кетиладиган озиқ-овқат ва алкоголли ичимликлар сотиб олиш тақиқланади. Бу ҳақда BFM TV’га таяниб, «РБК» хабар бермоқда.
Аҳоли ушбу хизматлардан соат 22:00 дан 6:00 гача фойдалана олмайди. Тақиқ 6 ноябрдан кучга киради. У қанча муддат давом этишига аниқлик киритилмаган.
«Аслида, бу соат 22:00 дан 6:00 гача ушбу муассасаларнинг ёпилишини англатади», – дейилади хабарда.
Бундан ташқари, фармонига кўра алкоголли ичимликларни тунда сотиш ва одамлар кўп бўлган жойларда истеъмол қилиш тақиқланади.
Париж мэри Анн Идальго ушбу чекловларни изоҳлар экан, сўнгги пайтларда полиция тунда ресторан ҳамда барларга ташриф буюрувчилар фаолиятини кузатаётганини маълум қилди.
Унинг сўзларига кўра, овқатланиш шохобчалари мижозлари масофани сақламаган ва Соғлиқни сақлаш вазирлиги томонидан белгиланган тавсияларни бузган.
Сўнгги 24 соат ичида Францияда коронавирус билан касалланган 40 558 киши аниқланди. Улардан 211 киши интенсив терапияга юборилди. Айни пайтда COVID-19 билан касалланган 4089 киши Франция касалхоналарида жонлантириш бўлимларида ётибди. Францияда ҳозиргача 1,5 миллиондан ортиқ касаллик аниқланди. Беморларнинг 38 674 киши вафот этди.
Изоҳ (0)