Aralash jang san’atlari sport (MMA) turi bo‘yicha UFC promoushenining ikki vazn toifasidagi sobiq chempioni Konor Makgregorning UFC’dagi faoliyati davomida qancha mablag‘ga ega bo‘lgani hisoblab chiqildi. Bu haqda The Sun xabar bermoqda.
Konor UFC’dagi ilk jangini 2013-yilda o‘tkazgan. Promoushen bayrog‘i ostidan dastlabki 6 ta jangida irlandiyalik sportchi jami 500 ming dollardan ko‘proq mablag‘ga ega bo‘lgan. Yarim yengil vazn toifasidagi dastlabki kamar uchun kechgan jangi orqali 1 million dollarni qo‘lga kiritgan. Ushbu jangda Konor amerikalik Neyt Dias bilan jang qilgandi. Dias bilan revansh jangi uchun esa Makgregorga 3 million dollar berilgan. Ched Mendes va Joze Aldoga qarshi janglardan bir xil 500 ming dollardan olgan.
Habib Nurmagomedov bilan jangdan yutqazganiga qaramay 3 million dollarga ega chiqqan. O‘zining UFC’dagi so‘nggi jangi uchun (Donald Serronega qarshi) esa 5 million dollar olgan. Qayd etish joiz, Makgregor ushbu jangda Serroneni 40 soniya ichida nokautga uchratgan edi.
Shu tariqa Konor Makgregorning UFC’da ishlab topgan jami mablag‘i 15 million dollarni tashkil etgan. Bunda televideniye bonuslari hamda pulli translyatsiyalar ulushlari hisobga olinmagan.
Ma’lumot uchun, irlandiyalik sportchi MMA’dagi faoliyati davomida 22 ta jangda g‘alaba qozongan, 4 ta jangda esa mag‘lub bo‘lgan. UFC bayrog‘i ostidagi janglari soni 12 tani tashkil etadi.
Avvalroq Habib Nurmagomedovning MMA’dagi faoliyati davomida qancha mablag‘ ishlab topgani haqida xabar berilgandi.
Mavzuga doir: Habib Nurmagomedovning MMA’dagi faoliyati davomida qancha mablag‘ ishlab topgani ma’lum bo‘ldi
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)