Professional boksning og‘ir vazn toifasida ringga chiqayotgan Oleksandr Usikning (18-0, 13 KO) Derek Chisoraga (32-10, 23 KO) qarshi jangdan qancha mablag‘ ishlab olgani Total Sport nashri tomonidan e’lon qilindi.
Unga ko‘ra, Usik ushbu jangdan 1,9 million dollar kafolatlangan gonorarga ega bo‘lgan. Derek Chisora esa Usikdan qariyb uch barobar ko‘proq — 5,2 million dollar ishlab olgan.
Qayd etish joiz, bunda televideniye bonuslari hamda pulli translyatsiyadan tushadigan qo‘shimcha mablag‘lar hisobga olinmagan.
Eslatib o‘tamiz, 31-oktabr kuni Usik og‘ir vazn toifasidagi ikkinchi jangida Chisora bilan ringga chiqib, raqibini ochkolar evaziga taslim etgandi. Natijada Oleksandr WBO kamari uchun majburiy da’vogarga aylandi.
Ukrainalik bokschining navbatdagi raqibi og‘ir vazn toifasida WBA, WBO, IBF, IBO kamarlari sohibi Entoni Joshuaga qarshi kechishi kutilmoqda.
Ma’lumot uchun, Usik birinchi og‘ir vazn toifasida mutlaq chempion bo‘lgan. Shundan so‘ng bir vazn tepaga, ya’ni og‘ir vazn toifasiga o‘tishga qaror qilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)