Uchqo‘rg‘ondagi kartodromda karting poygasi bo‘yicha O‘zbekiston chempionatining ochilish marosimi, 6-noyabr, juma kuni bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Yoshlar o‘rtasida sportning ushbu turiga bo‘lgan yuqori qiziqishni hisobga olib, “Vatanparvar” tashkiloti Uchqo‘rg‘on tuman o‘quv-sport texnika klubi tomonidan xalqaro standart talablariga javob beradigan yangi zamonaviy kartodrom qayta barpo etildi. Uning umumiy uzunligi 1000 metrdan oshiq bo‘lib, uch yo‘nalishdan iborat.
Ushbu kartodrom karting poygasi bo‘yicha O‘zbekiston chempionatiga mezbonlik qilmoqda. Musobaqada Qoraqalpog‘iston Respublikasi, viloyatlar va Toshkent shahridan 150 nafarga yaqin sportchilar ishtirok etmoqda. Ular ichida eng yosh ishtirokchi atigi 8 yoshga to‘lgan.
— Viloyatimizda sportning texnik va amaliy turlarini rivojlantirish va ommaviylashtirish uchun barcha sharoitlarni yaratib berishga tayyormiz. Chunki bu sport turlari yoshlarni vatanparvarlik ruhida, sog‘lom va shijoatli etib tarbiyalashda muhim ahamiyatga ega, — dedi ochilish marosimida ishtirok etgan viloyat hokimi Shavkatjon Abdurazzaqov.
Viloyat hokimi karting bo‘yicha O‘zbekiston chempioni, 12 yashar Yasmina Egamberdiyevaning taklifi bilan karting mashinasiga o‘tirib, davra aylandi.
Ma’lumot uchun, karting poygasi bo‘yicha O‘zbekiston chempionati 9-noyabrgacha davom etadi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)