“Milan” darvozasiga 3 ta gol urgan turkiyalik 23 yoshli Yusuf Yaziji Yevrokuboklar tarixida noyob natija qayd etdi

Yevropa Ligasi guruh bosqichi 3-turidan o‘rin olgan “Milan”—“Lill” uchrashuvi mehmonlarning g‘alabasi bilan yakunlandi (0:3).

O‘yindagi uchala golga ham “Lill”ning turkiyalik 23 yoshli hujumkor yarim himoyachisi Yusuf Yaziji mualliflik qildi.

Natijada Yaziji “rossonerilar” maydonida barcha musobaqalar doirasida so‘nggi 20 yil ichida het-trikka erishgan ilk futbolchi bo‘ldi. So‘nggi bor “San-Siro”da het-trikka erishish baxti braziliyalik Rivaldoga nasib etgandi. 2000-yil oktabrida Chempionlar Ligasi uchrashuvi doirasida Rivaldo “Barselona” safida “Milan”ga safardagi bahsda uchta gol urgandi. O‘yin esa 3:3 hisobi bilan yakuniga yetgandi.

Qayd etish joiz, bu Yusufning Yevropa Ligasi 2020/21-yilgi mavsumi doirasidagi ikkinchi het-trikidir. Futbolchi guruh bosqichi 1-turi doirasida safarda Praganing “Sparta”siga ham uchta gol urgandi. Natijada Yaziji UEFA bayrog‘i ostidan o‘tayotgan musobaqalar (Yevropa Ligasi, Chempionlar Ligasi) doirasida bir mavsumning o‘zida ikki safar o‘yinida ikkita het-trikka erishgan ilk futbolchi bo‘ldi.

Ma’lumot uchun, Yusuf Yaziji 2019-yil avgustida “Trabzonspor” klubidan 17,5 million yevro evaziga “Lill”ga o‘tgandi. U 2020/21-yilgi mavsum fransuz jamoasi safida barcha musobaqalar doirasida 11 ta o‘yinda qatnashib, 7 ta gol urdi.

Yevropa Ligasi H guruhida 3-turdan so‘ng vaziyat esa quyidagicha ko‘rinish oldi:

1. “Lill” — 7 ochko
2. “Milan” — 6 ochko
3. “Sparta” — 3 ochko
4. “Seltik” — 1 ochko