O‘zbekiston tashqi ishlar vaziri Abdulaziz Komilov 2020-yilning 5-noyabr kuni Toshkent shahriga amaliy tashrif bilan kelgan Qirg‘iziston tashqi ishlar vaziri Ruslan Kazakbayev bilan uchrashdi, deya xabar bermoqda vazirlik axborot xizmati.
Ma’lum qilinishicha, muzokaralar chog‘ida siyosiy, savdo-iqtisodiy, investitsiya, transport-kommunikatsiya, suv xo‘jaligi va madaniy-gumanitar sohalarda O‘zbekiston–Qirg‘iziston hamkorligining hozirgi holati va uni yanada rivojlantirish istiqbollari muhokama qilindi.
Vazirlar ko‘p tomonlama tuzilmalar doirasidagi o‘zaro aloqalar, shuningdek, mintaqaviy va xalqaro kun tartibini muhokama qildi. Markaziy Osiyo mamlakatlari o‘rtasidagi hamkorlikning ijobiy sur’atini saqlab qolishdan ikki tomon ham birdek manfaatdor ekanligi ma’lum qilindi.
Tomonlar, shuningdek, koronavirus tarqalishiga qarshi kurashish va pandemiyaning O‘zbekiston va Qirg‘iziston o‘rtasidagi munosabatlarga ta’sirini minimallashtirish bo‘yicha birgalikdagi sa’y-harakatlar to‘g‘risida fikr almashdilar.
TIV rahbarlari ikki tomonlama tadbirlarni davom ettirish, shu jumladan, O‘zbekiston–Qirg‘iziston Hukumatlararo komissiyasining va ikki mamlakat chegaraoldi viloyatlari hokimlari (vakolatli vakillari) Kengashining navbatdagi yig‘ilishini o‘tkazish muhimligini ta’kidladilar.
Oliy va yuqori darajadagi muqaddam erishilgan kelishuvlarga sodiqlik tasdiqlandi. O‘zbekiston va Qirg‘iziston o‘rtasidagi strategik sheriklik va ko‘p qirrali hamkorlikni mustahkamlash muhimligi qayd etildi.
Uchrashuv yakunlari bo‘yicha qo‘shma bayonot qabul qilingani ma’lum qilindi.
Mavzuga doir:
- O‘zbekiston TIV Turkiyada yuz bergan zilzilada halok bo‘lgan va jarohat olganlar orasida o‘zbekistonliklar yo‘qligini ma’lum qildi
- Qirg‘iziston tashqi ishlar vaziri O‘zbekiston elchisi bilan uchrashuvda mamlakatdagi siyosiy vaziyat barqarorlashganini ma’lum qildi
- Abdulaziz Komilov Hindistonning O‘zbekistondagi yangi elchisini qabul qildi
Izoh (0)