O‘zbekiston Monopoliyaga qarshi kurashish qo‘mitasi Xalq ta’limi vazirligining “2021—2025-yillarda umumta’lim maktablarini mebel, o‘quv-laboratoriya asbob-uskunalari, sport anjomlari va o‘qitishning texnik vositalari bilan jihozlash chora-tadbirlari to‘g‘risida”gi hukumat qarori loyihasini o‘rganib chiqdi.
Qo‘mitaning o‘rganish natijalariga ko‘ra bergan xulosasida qayd etilishicha, ko‘p yillar davomida mamlakatda ayrim xo‘jalik yurituvchi subyektlarga eksklyuziv huquqlar berish orqali sun’iy monopoliya yaratilganligi iqtisodiyotda sog‘lom raqobat muhiti shakllanishiga salbiy ta’sir ko‘rsatib kelmoqda. Bunday tizim budjet mablag‘lari asossiz sarflanishiga olib keladi.
Qaror loyihasining 4-bandi uchinchi xatboshida umumta’lim maktablariga mebel va maxsus o‘rnatish talab etilmaydigan jihozlarni yetkazib berish va o‘rnatish ishlari hamda jihozlarni ta’mirlash ishlari “O‘quv ta’lim-ta’minot” davlat unitar korxonasi tomonidan amalga oshirilishi ko‘rsatilgan.
“Vaholanki, mazkur vazifalarni davlat xaridlarida g‘olib bo‘lgan ishlab chiqaruvchi yoki yetkazib beruvchilar (ish bajaruvchi) tomonidan bajarilishi lozim. Bu mantiqiy va moliyaviy tomonlama maqsadga muvofiq hisoblanadi, chunki tovarlarni joylarga yetkazib berishda va o‘rnatishda ularni sifatiga va texnik talablarga muvofiqligiga tenderda g‘olib bo‘lgan korxona javob beradi”. — deyiladi Monopoliyaga qarshi kurashish qo‘mitasi xabarida.
“Bunda ‘O‘quv ta’lim-ta’minot’ DUKning moddiy-texnika bazasini mustahkamlashga davlat budjeti hisobidan (13 milliard so‘m) ortiqcha mablag‘lar ajratilishi hamda alohida yana ushbu DUK tomonidan tovarlarni joylarga yetkazib berish va o‘rnatish uchun mablag‘lar ajratish talab etilmaydi va o‘z navbatida budjet mablag‘lari tejaladi”, — deyiladi qo‘mita xulosasida.
Monopoliyaga qarshi kurashish qo‘mitasi qaror loyihasidan yuqoridagi bandni chiqarib tashlash lozim, deb hisoblamoqda.
Loyihaga ko‘ra, 2021—2025-yillarda 5046 ta maktab (120 mingdan ortiq o‘quv xonalarini) jihozlash rejalashtirilgan.
Izoh (0)