Gapirish va eshitish bilan bog‘liq imkoniyati cheklangan shaxslar Toshkent shahridagi Davlat xizmatlari markazlariga murojaat qilganda surdotarjimonsiz istalgan davlat xizmatlaridan foydalanishlari mumkin. Bu haqda 3-noyabr kuni Davlat xizmatlari agentligi Toshkent shahar boshqarmasi tomonidan tashkil etilgan tadbirda ma’lum qilindi, deya xabar bermoqda “Daryo” muxbiri Musulmonbek Ibrohimov.
Anjumanda ta’kidlanishicha, Toshkent shahridagi 11 ta tuman Davlat xizmatlari markazlarida tajriba sinov tariqasida surdo-onlayn planshetlari (maxsus elektron moslamasi) ishga tushirildi.
Davlat xizmatlari agentligi Toshkent shahar boshqarmasi axborot xizmati rahbari Oybek Hasanovning ma’lum qilishicha, Davlat xizmatlari markazlarining kirish qismlarida, fuqarolarni qabul qilish burchaklarida hamda surdo-onlayn planshetlari joylashgan operatorlarning ish stoliga maxsus belgilar joylashtirilgan.
“Maxsus belgilar o‘z navbatida Davlat xizmatlari markazlariga tashrif buyurgan imkoniyati cheklangan shaxslarga to‘g‘ridan-to‘g‘ri surdo-onlayn plansheti joylashgan operatorga yo‘naltiradi. Davlat xizmatlari markazlariga joylashtirilgan surdo-onlayn planshetlari bevosita onlayn tarzda, ya’ni internet kommunikatsiya tizimi orqali doimiy ravishda ishlaydi va to‘g‘ridan to‘g‘ri operatorga tarjima qiladi”, – dedi Oybek Hasanov.
Uning qo‘shimcha qilishicha, kelgusida ushbu tizimni respublikaning barcha hududlarida joylashgan Davlat xizmatlari markazlarida hamda Fuqarolik holati dalolatnomalarini yozish organlarida joriy qilish nazarda tutilgan.
Ma’lumot uchun, Toshkent shahrida 3 ming nafardan ortiq eshitishida va gapirishida nuqsoni bor shaxslar ro‘yxatga olingan.
Izoh (0)