2018—2020-yillar davomida tuman hokimliklari zaxirasida bo‘lgan 1,5 million gektar yer o‘rmon xo‘jaliklari balansiga olindi. Bu haqda O‘rmon xo‘jaligi davlat qo‘mitasi raisi o‘rinbosari G‘olibjon Qurbonov “Daryo” muxbiri Musulmonbek Ibrohimovga bergan qisqacha intervyusida aytib o‘tdi.
G‘olibjon Qurbonovning ma’lum qilishicha, o‘tgan uch yil davomida Andijonda 3 ming uch yuz, Samarqandda 4 ming 8 yuz, Qashqadaryoda 29 ming 2 yuz, Navoiyda 160 ming, Sirdaryoda 2 ming, Buxoroda 26 ming 9 yuz, Namanganda 4 yuz, Surxondaryoda 66 ming, Jizzaxda 43 ming 4 yuz, Farg‘onada 3 yuz, Xorazmda 1 ming 7 yuz, Toshkent viloyatida 19 ming 1 yuz gektar va Qoraqalpog‘istonda esa 1 million 150 ming 3 yuz gektar yer maydonlari tuman hokimligi zaxirasidan o‘rmon xo‘jaliklari balansiga olingan.
“Buxoroda 10, Jizzaxda 1, Qashqadaryoda 10 ming, Navoiyda 1 ming, Samarqandda 18, Surxondaryoda 40, Sirdaryoda 27, Xorazmda 2 ming, Toshkent viloyatida 10 ming gektar tuman hokimliklari tomonidan noqonuniy olib qo‘yilgan yer maydonlari o‘rmon xo‘jaliklari balansiga qaytarilgan”, – dedi qo‘mita vakili.
Ma’lumot uchun, O‘zbekiston hududining 11 million gektardan ziyod yerlari o‘rmon xo‘jaliklariga tegishli. Shundan 3 million gektardan ortiq yer maydoni o‘rmon bilan qoplangan.
Izoh (0)