Turkiya g‘arbidagi Izmir viloyatida yuz bergan zilzila qurbonlari soni 79 kishiga yetdi, deb yozadi “TASS” Turkiya Favqulodda vaziyatlar boshqarmasiga tayanib.
“79 nafar fuqaro halok bo‘ldi. 962 nafar yaradordan 743 nafari kasalxonadan chiqarildi, 219 kishi davolanishda davom etmoqda”, — deyiladi muassasa xabarida.
Anadolu agentligining yozishicha, Turkiya prezidenti Rajab Toyyib Erdo‘g‘on avvalroq davlatning barcha zarur resurslari zilzila oqibatlarini bartaraf qilishga yo‘naltirilishini aytdi. Davlat rahbari boshpanasidan ajralgan fuqarolarning barchasiga yangi xonadonlar berilishini ta’kidladi.
Zilzila 30-oktabr kuni tushdan keyin Turkiyaning g‘arbiy qismida sodir bo‘lgan, uning kuchi 6,6 ballni tashkil etgandi. Zilzila epimarkazi Egey dengizida, Izmir viloyatining Seferihisar shahri yaqinida bo‘lgan.
Yer silkinishi kuchi Gretsiya orollarida ham sezilgan. Grek seysmologlari uning kuchini 6,9 ball deb baholadi. Zilzila oqibatida Gretsiyaning Samos orolida ikki kishi halok bo‘ldi, 20 kishi jarohat oldi. Orolda 6 oylik favqulodda holat e’lon qilindi.
Izoh (0)