Jahon sog‘liqni saqlash tashkiloti bosh direktori Tedros Adan Gebreyesus yaqin kunlar davomida biroz vaqt o‘z-o‘zini yakkalash rejimiga rioya qilishini aytdi, deb yozadi “RBK” uning Twitter’iga tayanib.
“Men COVID-19’ga topshirgan testi ijobiy chiqqan odam bilan aloqada bo‘lganim aniqlandi”, — deb yozdi Gebreyesus.
JSST bosh direktorining so‘zlariga ko‘ra, u o‘zini yaxshi his qilmoqda va unda kasallikning hech qanday simptomlari yo‘q. “Yaqin kunlar davomida JSST protokollariga muvofiq, o‘z-o‘zimni yakkalayman va uydan ishlayman”, — dedi tashkilot rahbari.
U, shuningdek, koronavirus tarqalishiga qarshi kurash bo‘yicha barcha talablarni aniq bajarish zarurligini ta’kidladi. “Aynan shu tariqa biz COVID-19’ning yuqish zanjirini uzamiz”, — dedi u.
Jons Hopkins universiteti ma’lumotlariga ko‘ra, koronavirus pandemiyasi boshidan buyon dunyoda 46 milliondan ortiq kishi infeksiyaga chalindi, 1,18 milliondan ziyodi vafot etdi.
30-oktabr kuni Gebreyesus Jenevada bo‘lib o‘tgan JSST brifingida koronavirus bilan kasal bo‘lganlarda sog‘ayganidan so‘ng organizmning muhim tizimlariga ta’sir qiluvchi asoratlar yuzaga kelishi tashkilotni xavotirga solayotganini aytgandi.
Izoh (0)