Жаҳон соғлиқни сақлаш ташкилоти бош директори Тедрос Адан Гебрейесус яқин кунлар давомида бироз вақт ўз-ўзини яккалаш режимига риоя қилишини айтди, деб ёзади «РБК» унинг Twitter’ига таяниб.
«Мен COVID-19’га топширган тести ижобий чиққан одам билан алоқада бўлганим аниқланди», — деб ёзди Гебрейесус.
ЖССТ бош директорининг сўзларига кўра, у ўзини яхши ҳис қилмоқда ва унда касалликнинг ҳеч қандай симптомлари йўқ. «Яқин кунлар давомида ЖССТ протоколларига мувофиқ, ўз-ўзимни яккалайман ва уйдан ишлайман», — деди ташкилот раҳбари.
У, шунингдек, коронавирус тарқалишига қарши кураш бўйича барча талабларни аниқ бажариш зарурлигини таъкидлади. «Айнан шу тариқа биз COVID-19’нинг юқиш занжирини узамиз», — деди у.
Жонс Ҳопкинс университети маълумотларига кўра, коронавирус пандемияси бошидан буён дунёда 46 миллиондан ортиқ киши инфекцияга чалинди, 1,18 миллиондан зиёди вафот этди.
30 октябрь куни Гебрейесус Женевада бўлиб ўтган ЖССТ брифингида коронавирус билан касал бўлганларда соғайганидан сўнг организмнинг муҳим тизимларига таъсир қилувчи асоратлар юзага келиши ташкилотни хавотирга солаётганини айтганди.
Изоҳ (0)