Indiana shtatining Fishers shahrida mahalliy baliqchilardan biri “Geyts” suv omboridan 32 yil oldin o‘g‘irlab ketilgan Chevrolet Camaro’ni topib oldi, deb xabar beradi Motor.

Foto: Facebook / Fishers Police Department

Baliqchining topilmasi to‘g‘risida xabar topgan mahalliy politsiya hodisa joyiga g‘avvoslarni jo‘natgan. Politsiya ma’lumotlarga ko‘ra, baliqchi avtomobilni o‘zining gidrolokatori — akustik to‘lqinlar orqali suv ostidagi obyektlarni ovoz yordamida aniqlovchi vosita ko‘magida aniqlagan.

Foto: Facebook / Fishers Police Department

G‘ildiraklari osmonga qarab yotgan avtomobil loy va suv o‘tlari bilan qoplangan. 1987-yilda ishlab chiqarilgan Chevrolet Camaro g‘avvoslar va ko‘tarma kran yordamida suv ostidan chiqarib olingan. O‘ttiz yil suv ostida yotgan mashina juda yomon ahvolda.

Foto: Facebook / Fishers Police Department

Qiziqarli jihati, avtomobil yotgan ko‘prik bundan 15 yil oldin ta’mirlangan. Shunga qaramay ishchilar avtomobilni payqamagan.

Foto: Facebook / Fishers Police Department

Politsiyachilarning aniqlashicha, ushbu avtomobil o‘g‘irlab ketilgan bo‘lib, uning egasi ham olamdan o‘tib ketgan.

Avvalroq Avstraliyada ikki yil oldin okeanga cho‘kib ketgan bir juft Chevrolet Silverado suvdan chiqarib olingani to‘g‘risida xabar berilgandi.