Америкалик тадқиқотчилар коронавирус белгисиз ўтаётган беморларнинг йўтали соғлом инсонлар йўталидан товуши бўйича фарқ қилишини аниқлади. Инсон қулоқлари уни фарқлай олмайди, аммо бу сунъий интеллектнинг қўлидан келади, деб ёзади Esquire.
Массачусец технологиялар институтидан бўлган бир гуруҳ олимлар беморнинг йўталишига қараб коронавирус ташхисини қўядиган дастурни яратди. Олимларнинг фикрича, сунъий интеллект, айниқса, касаллик белгисиз ўтаётган беморларни аниқлашга қўл келади.
Алгоритм COVID-19 билан касалланган ва соғлом одамларни 98,5 фоиз аниқликда ажрата олади. Тизим ўн минглаб йўтал намуналари асосида яратилган.
Ҳозирда олимлар гуруҳи дастурдан мобил илова орқали фойдаланиш имкониятни яратиш устида иш олиб бормоқда. Агарда АҚШ Соғлиқни сақлаш ва ижтимоий хизматлар вазирлиги мазкур ихтиродан кенг кўламда фойдаланишга рухсат берса, мобил илова касалликни аниқлашда қулай ва бепул иловага айланиши мумкин.
Дастур муаллифлари ўзларининг ихтироси коронавирусни аниқлашда ягона восита бўлмаслигини таъкидлаб ўтган. Агар сунъий интеллект инфекцияни аниқласа, шундан сўнг COVID-19’га анъанавий тест топшириш керак бўлади.
Аввалроқ Эронда коронавирусни ярим дақиқада аниқловчи нанотест, америкалик олимлар коронавирусни тезда аниқловчи қурилма яратилгани тўғрисида хабар берилганди.
Изоҳ (0)